स्थानिक स्वराज्य संस्थांच्या निवडणुकीआधीच महायुतीत फुटीची चर्चा रंगलीय.. कारण जिथं बळ तिथं स्वबळ असा नाराच भाजपनं दिलाय.. तर दुसरीकडे छत्रपती संभाजीनगरच्या बैठकीत भाजप पदाधिकाऱ्यांनी थेट मुख्यमंत्री देवेंद्र फडणवीसांसमोरच मराठवाड्यात अजित पवारांच्या राष्ट्रवादीसोबत जायला नकार दिलाय. त्याची इनसाईड स्टोरीच साम टीव्हीच्या हाती लागलीय..

मुख्यमंत्री फडणवीसांच्या उपस्थितीत मराठवाड्यात भाजप पदाधिकाऱ्यांची बैठक झाली.. एकवेळ एकनाथ शिंदेंच्या शिवसेनेसोबत युती करु, पण अजित पवारांच्या राष्ट्रवादीसोबत युती नको, अशी भूमिका भाजप पदाधिकाऱ्यांनी घेतली..त्याबरोबरच शिंदेसेनेने लोकसभा आणि विधानसभा निवडणुकीत त्रास दिल्याचा पाढाही पदाधिकाऱ्यांनी फडणवीसांसमोर वाचला.. त्यानंतर मराठवाड्यातील 8 जिल्ह्यात युतीबाबत स्थानिक पातळीवर निर्णय घ्या, अशा सूचना फडणवीसांनी दिल्याची माहिती सुत्रांनी दिलीय..

खरंतर मुख्यमंत्री देवेंद्र फडणवीसांनी छत्रपती संभाजीनगरच्या बैठकीआधीच जिथं बळ तिथं स्वबळ आणि जिथे विरोधक प्रबळ तिथं युती असं जाहीर केलं.. यावर उपमुख्यमंत्री अजित पवारांनी मात्र सावध प्रतिक्रिया दिलीय..

एका बाजूला भाजप पदाधिकाऱ्यांकडून अजित पवारांच्या राष्ट्रवादीसोबतच्या युतीला विरोध होतोय.. तर दुसरीकडे शिंदेसेनेचे मंत्री संजय शिरसाट यांनीच महायुतीत काही जणांकडून छळकपट सुरु असल्याचं सांगत नाराजी व्यक्त केलीय..

मात्र मराठवाड्यात संख्याबळानुसार महायुतीत कुणाचं पारडं जड आहे?

मराठवाड्यातील 46 विधानसभांपैकी 40 जागांवर महायुतीचे आमदार विजयी झाले..यात भाजपचे 19, अजित पवारांच्या राष्ट्रवादीचे 8 तर शिंदेसेनेचे 13 आमदार विजयी झाले आहेत.

मराठवाड्यातील छत्रपती संभाजीनगर, जालना आणि धाराशिवमध्ये अजित पवारांच्या राष्ट्रवादीची ताकद अत्यंत कमी आहे... तर बीडमध्ये शिंदेसेना कमकुवत आहे.. नेमकं हाच धागा पकडून भाजपने बार्गेनिंग सुरु केल्याची चर्चा रंगलीय.. मात्र निवडणुकीच्या आधीच महायुतीत फुटीची बिजं पेरली जात आहेत... त्यामुळे अजित पवारांच्या राष्ट्रवादीला दूर ठेवल्याने त्याचा महायुतीला फटका बसणार का? याकडं राज्याचं लक्ष लागलंय..