राज्यात पुढचे काही दिवस पावसाचे आहेत. आजही राज्यातील अनेक ठिकाणी पाऊस पडण्याची शक्यता आहे. भर पावसामध्ये नागरिकांना दिवाळी साजरी करावी लागणार आहे. आज राज्यातील विदर्भ आणि कोकणात पाऊस पडण्याची शक्यता आहे. नागरिकांनी काळजी घ्यावी असे आवाहन हवामान खात्याकडून करण्यात आले आहे.

पावसाळा संपला तरी देखील राज्यात पावसाने विश्रांती घेतली नाही. नवरात्रोत्सव संपून आता दिवाळी सण सुरू झाला तरी देखील राज्यातील अनेक ठिकाणी पाऊस पडत आहे. दिवाळीवर पावसाचे सावट असल्यामुळे पावसामध्ये दिवाळी साजरी करण्याची वेळ नागरिकांवर आली आहे. राज्यातील अनेक जिल्ह्यांमध्ये ढगाळ वातावरण आहे. तर काही ठिकाणी विजांच्या कडकडाट आणि ढगांच्या गडगडाटासह हलका ते मध्यम स्वरूपाचा पाऊस पडत आहे.

हवामान खात्याने दिलेल्या माहितीनुसार, आज ३१ ऑक्टोबरला कोकण आणि विदर्भात पावसाचा अंदाज आहे. कोकणामधील रायगड, रत्नागिरी आणि सिंधुदुर्गमध्ये ढगाळ वातावरणासह हलका पाऊस पडण्याची शक्यत आहे. विदर्भातील नागपूर आणि अमरावती वगळता इतर सर्वच ठिकाणी पावसाचा अंदाज आहे. उत्तर नगर आण उत्तर संभाजीनगर, पुणे आणि सातारा येथील १५ जिल्ह्यात ढगाळ वातावरणसहित किरकोळ पाऊस पडण्याची शक्यता आहे. तर उर्वरित २१ जिल्ह्यात स्वच्छ वातावरण जाणवेल.

हवामान तज्ज्ञ माणिकराव खुळे यांनी दिलेल्या माहितीनुसार, राज्यात पुढचे ४ दिवस पावसाची शक्यता आहे. ३१ ऑक्टोबर ते ३ नोव्हेंबर दरम्यान महाराष्ट्रातील काही जिल्ह्यांमध्ये हलका ते मध्यम स्वरूपाचा पाऊस पडू शकतो. तर काही ठिकाणी ढगाळ वातावरण राहिल. त्यानंतर राज्यात सर्वच ठिकाणी हळूहळू थंडी पसरण्यास सुरूवात होईल.