Maharashtra weather forecast IMD yellow : महाराष्ट्रात पुन्हा एकदा वादळी वाऱ्यासह मुसळधार पावसाची शक्यता वर्तवण्यात आली आहे. मुंबई हवामान विभागाच्या अंदाजानुसार, पुढील ४ दिवस उत्तर महाराष्ट्र आणि मराठवाड्यात विजांच्या कडकटाटासह पावसाची शक्यता वर्तवण्यात आली आहे. मुंबई, ठाणे, पुण्यासह नाशिक जिल्ह्यात ढगाळ हवामान राहील, तसेच तुरळक ठिकाणी हलक्या पावसाची शक्यता वर्तवण्यात आली आहे.

हवामान विभागाने (IMD) पुढील ४ दिवसांसाठी विविध जिल्ह्यांमध्ये 'यलो अलर्ट' (Yellow Alert) जारी केला आहे. ९ ऑगस्ट रोजी मध्य महाराष्ट्र, उत्तर महाराष्ट्र आणि मराठवाड्यातील बहुतांश जिल्ह्यांमध्ये ३० ते ४० किमी प्रतितास वेगाने वाहणारे वारे आणि विजांच्या कडकडाटासह वादळी पावसाचा अंदाज वर्तवण्यात आला आहे. तर १० ऑगस्ट रोजी विदर्भातील जवळजवळ सर्वच जिल्ह्यांमध्ये विजांच्या कडकडाटासह पावसाची शक्यता आहे. दरम्यान, ११ आणि १२ ऑगस्ट रोजी पावसाचा जोर ओसरणार असून कुठलाही मुख्य इशारा देण्यात आलेला नाही.

रविवारी विजांच्या कडकडाटासह वादळी वारे (३०-४० किमी/तास) आणि पावसाची शक्यता वर्तवण्यात आली आहे. जळगाव, नाशिक, अहिल्यानगर, छत्रपती संभाजीनगर, जालना, परभणी, बीड, हिंगोली, नांदेड, लातूर, धाराशिव, गोंदिया, नागपूर या जिल्ह्याला यलो अलर्ट जारी करण्यात आला आहे.

सोमवारी विदर्भातील अनेक जिल्ह्यांमध्ये विजांच्या कडकडाटासह पावसाचा यलो अलर्ट देण्यात आला आहे. अकोला, अमरावती, बुलढाणा, चंद्रपूर, गडचिरोली, गोंदिया, नागपूर, वर्धा, वाशिम, यवतमाळ या जिल्ह्यात वादळी वाऱ्यासह मुसळधार पावसाची शक्यता वर्तवण्यात आली आहे.

मंगळवारी आणि बुधवारी राज्यात पावसाचा जोर कमी होईल. हवामान विभागाने कोणत्याही जिल्ह्याला यलो अलर्ट जारी केलेला नाही. पण राज्यात ढगाळ हवामान राहील असा अंदाज वर्तवला आहे. अनेक ठिकाणी हलका ते मध्यम पावसाची शक्यता वर्तवण्यात आली आहे. रविवारी आणि सोमवारी उत्तर मध्य महाराष्ट्र आणि मराठवाड्यातील काही ठिकाणी विजांच्या कडकडाटासह वादळ, हलका ते मध्यम पाऊस आणि ताशी ३०-४० किमी वेगाने वाहणारे सोसाट्याचे वारे येण्याची दाट शक्यता आहे.