Maharashtra Weather राज्यातील अनेक भागात आज देखील अवकाळी पावसाने जोरदार हजेरी लावत अक्षरशः झोडपून काढले आहे. मागील सात- आठ दिवसांपासून वादळी वाऱ्यासह जोरदार पाऊस येत असल्याने मोठे नुकसान होत आहे. आज देखील नाशिकसह, नंदुरबार, शहापूर, अमरावती, मनमाड मध्ये जोरदार पाऊस झाला. नाशिकमध्ये वादळी वाऱ्यामुळे भले मोठे झाड रस्तावरील तीन वाहनांवर कोसळले. सुदैवाने यात जीवितहानी झाली नाही.

नाशिकला पुन्हा अवकाळी पावसाने झोडापले

गेल्या आठ दिवसांपासून नाशिक शहरात वादळी वाऱ्यासह पाऊस येत आहे. आज दुपारच्या सुमारास देखील नाशिकला पुन्हा एकदा अवकाळी पावसाने झोडपून काढले आहे. तर नाशिकच्या शरणपूर रोड परिसरात तीन वाहनांवर भलेमोठे झाड कोसळले. यात वाहनांचे मोठ्या प्रमाणात नुकसान झाले आहे. कालच दुचाकीवर झाड पडून दोघांचा मृत्यू झाला होता. यानंतर आज देखील झाड पडून दोन चारचाकी वाहनासह रिक्षावर झाड पडल्याने मोठ्या प्रमाणात नुकसान झाले आहे. 

मनमाडमध्ये पावसाची हजेरी
मनमाड शहरात आज पुन्हा विजांच्या गडगडतात मध्यम स्वरूपाची हजेरी लावली. हवामान विभागाने वर्तवलेल्या अंदाजानुसार नाशिक जिल्ह्याला पावसाचा ऑरेंज अलर्ट दिला असताना दुपारी ४ वाजेनंतर विजांच्या गडगडाटसह मनमाड व परिसरात पावसाने मध्यम स्वरूपात हजेरी लावली आहे. सकाळपासून कडक ऊन पडले असताना दुपारी अचानक ढग दाटून आल्यानंतर पावसाने हजेरी लावल्याने हवेत गारवा निर्माण झाल्याने नागरिकांना दिलासा मिळाला. 

नंदुरबारमध्ये सलग सहाव्या दिवशी पाऊस 

नंदुरबार जिल्ह्यात गेल्या सहा दिवसापासून अवकाळी पावसाने थैमान घातला आहे. आज देखील वादळी वाऱ्यासह विजेच्या कडकडात अवकाळी पावसाने दमदार हजेरी लावली. अवकाळी पावसामुळे नुकताच लागवड केलेल्या शेती पिकांचे देखील नुकसान होण्याची शक्यता आहे. तसेच अचानक आलेल्या पावसामुळे बाजार समितीतील विक्रीसाठी आलेला धान्य माल खराब होण्याची शक्यता निर्माण झाली आहे. 

शहापूरमध्ये वादळी वाऱ्यासह तुफान पाऊस
पावसाने मे महिन्यात दमदार हजेरी लावल्याने गेल्या पाच दिवसांपासून शहापूर तालुक्यात अवकाळी पाऊस पडत आहे. आज दुपारनंतर पुन्हा पावसाने विजेच्या गडगडाट व वादळी वाऱ्यासह तुफान हजेरी लावली आहे. वादळी वाऱ्यासह जोरदार पावसात समोरचे काहीच दृश्य दिसत नसल्याचे पाहण्यास मिळाले.