Maharashtra : शिवसेना शिंदे गटाचे सोलापूरचे माजी जिल्हासंपर्क प्रमुख आणि माजी मंत्री तानाजी सावंत यांचे बंधू शिवाजी सावंत हे सोलापूर जिल्ह्यातील प्रमुख नेत्यांपैकी एक होते. काही दिवसांपूर्वी त्यांनी शिंदे गटातून बाहेर पडण्याचा निर्णय केला. पक्षात ते नाराज होते आणि या नाराजीमुळेच त्यांनी पदाचा राजीनामा दिला अशा चर्चा सुरु आहेत. त्यांच्या राजीनाम्यामुळे सोलापूरमध्ये शिंदे गटाला धक्का बसला होता.

शिवसेनेमधून बाहेर पडलेले शिवाजी सावंत हे लवकरच भाजपमध्ये जाणार असल्याच्या चर्चा राजकीय वर्तुळात रंगल्या आहेत. सोलापुरात पालकमंत्री जयकुमार गोरे यांच्यासह शिवाजी सावंत यांची बंद दरवाज्याच्या आड चर्चा झाल्याचे म्हटले जात आहे. चर्चेनंतर सावंत यांनी शिवसेनेत नाराज असल्याचे जाहीरपणे सांगत भाजप प्रवेशाबाबत सूचक वक्तव्य केले आहे.

शिवाजी सावंत यांच्या राजीनाम्यानंतर सोलापूर जिल्ह्यातील शिंदे गटातील अकराहून अधिक पदाधिकाऱ्यांनीसह कार्यकर्त्यांनी पक्षातून बाहेर पडण्याचा निर्णय घेतला. राजीनामे देणाऱ्यांमध्ये उपजिल्हाप्रमुख, जिल्हा समन्वयक अशा वेगवेगळ्या तालुक्यातील प्रमुख अधिकाऱ्यांचा समावेश होता. त्यामुळे सावंत यांच्या जाण्याने शिवसेनेला खिंडार पडल्याचे म्हटले गेले.

'एकनिष्ठपणे शिवसेना पक्षाचे काम करत आलो आहे. पक्षात नव्याने आलेल्यांनी एकनाथ शिंदे आणि वरिष्ठ नेत्यांना चुकीची माहिती दिली. त्यामुळे कुरघोडीचे राजकारण सुरु केले. माझी परवानगी न घेता माढा तालुक्याचा प्रमुख नेमला. पक्षाकडे तक्रार करुनही काही फायदा झाला नाही. १५ दिवस झाले राजीनामा देऊन पण साधी विचारणा झाली नाही. स्वाभिमान गहाण ठेवून राहण्यात काही अर्थ नाही', असे वक्तव्य शिवाजी सावंत यांनी केले आहे.