मयुर राणे, मुंबई|ता. ५ फेब्रुवारी २०२४

Sanjay Raut Press Conference:

उल्हासनगरमध्ये भाजप आमदार गणपत गायकवाड यांनी पोलीस स्टेशनमध्येच शिंदे गटाच्या पदाधिकाऱ्यावर गोळीबार केला. या गोळीबारात महेश गायकवाड हे गंभीर जखमी झाले असून सध्या त्यांच्यावर रुग्णालयात उपचार सुरू आहेत. या संपूर्ण प्रकरणावरुन शिवसेना ठाकरे गटाचे खासदार संजय राऊत यांनी शिंदे सरकारवर जोरदार हल्लाबोल केला आहे.

काय म्हणाले संजय राऊत?

"सध्या या देशात PMLA कायद्याचा गैरवापर करून विरोधकांना तुरुंगात टाकत आहेत त्यासाठी त्याचा वापर करत आहेत. हेमंत सोरेन यांना त्याच कायद्यानुसार तुरुंगात टाकले आहे. केजरीवाल यांना त्याच कायद्याने अटक करण्याचा घाट आहे. राज्यात मी, अनिल देशमुख, नवाब मलिक यांना अटक केली. गुन्हेगारी स्वरूपात कोणी पैसे घेतले तर त्यांना अटक झाली पाहिजे. गणपत गायकवाड यांचे कोट्यवधी रुपये एकनाथ शिंदेंकडे (Eknath Shinde) आहेत. त्याचा ईडीने शोध घ्यावा..." अशी मागणी संजय राऊत यांनी केली.

श्रीकांत शिंदे, पार्थ पवारांवर निशाणा...

"एका उपमुख्यमंत्री यांचे चिरंजीव गुंडाच्या घरी पुण्यात गेले आणि विचार आदान प्रदान केले. कालचा एकाचा फोटो आम्ही जाहीर केला बाकी लवकरच करु. ते कोण आहेत याची माहिती पुणे पोलिसांनी द्यावी. मुख्यमंत्री कार्यालयातून या गुंडांवर मॉनिटर होतं. त्यासाठी पोलीस काम करत आहेत. गृहमंत्री देवेंद्र फडणवीस एकनाथ शिंदे यांच्या दबावाखाली आहेत का?" असा सवालही संजय राऊत यांनी उपस्थित केला.

शिंदे गटाला इशारा...

यावेळी बोलताना संजय राऊत यांनी एक मोठा गौप्यस्फोटही केला. "माझ्याकडे शिंदे गटाच्या खासदारांचा परदेशात जातानाचा एक व्हिडिओ आला आहे. तो व्हिडिओ लवकरच बाहेर येईल. शिंदे गँगचे चरित्र लवकरच समोर येईल. वेट एन्ड वॉच, सगळं बाहेर येईल," असा सूचक इशाराही संजय राऊत यांनी दिला आहे. (Latest Marathi News)

(साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)