महापालिका निवडणुकीनंतर आता महापौरपदाच्या निवडीसाठी राज्यात घडामोडींना वेग आलाय. मुंबई महापालिकेत ठाकरेंना धक्का देणाऱ्या शिंदे सेनेला छत्रपती संभाजीनगरमध्ये मोठा धक्का बसलाय. येथे पक्षात बंडखोरी पहायला मिळत आहे. राज्यात महापालिकांच्या निवडणुका पार पडल्या. या निवडणुकांमध्ये भाजपला मोठं यश आलं.

भाजप हा नगर परिषद आणि नगर पंचायत निवडणुकांप्रमाणेच महापालिकेतही राज्यातील सर्वात मोठा पक्ष ठरला. भाजप जरी राज्यात सर्वात मोठा पक्ष ठरला असला तरी देखील अनेक महापालिकांमध्ये भाजपला स्पष्ट बहुमत मिळाले नाहीये. अनेक ठिकाणी भाजपला शिवसेना शिंदे गटाच्या पाठिंब्याची गरज आहे. त्यामुळे अनेक ठिकाणी भाजपकडे महापौरपद तर शिवसेना शिंदे गटाकडे उपमहापौरपद राहण्याचा अंदाज व्यक्त केला जातोय.

यासर्व पार्श्वभूमीवर आता छत्रपती संभाजीनगरमधून मोठी बातमी हाती आलीय. छत्रपती संभाजीनगरमध्ये देखील महापालिका निवडणुकीत भाजप हा सर्वात मोठा पक्ष ठरला, तर एमआएएम हा दुसऱ्या क्रमांकाचा पक्ष आहे.संभाजीनगरमध्ये शिवसेना शिंदे गट आणि भाजप वेगवेगळे निवडणूक लढलेत. पण तरी देखील शिवसेना शिंदे गटानं भाजपला पाठिंबा दिलाय.

त्यामुळे, आता या महापालिकेत भाजपचा महापौर तर शिवसेना शिंदे गटाचा उपमहापौर असेन. त्याचदरम्यान येथे शिंदे गटात फुट पडल्याचं दिसून येत आहे. शिवसेनेकडून त्रिंबक तुपे, अनिता घोडले, हर्षदा शिरसाट हे उपमहापौर पदासाठी पक्ष आदेश डावलून उमेदवारी अर्ज दाखल करणार असल्याची माहिती सुत्रांनी दिलीय.

तसेच जिल्हा परिषद मतदान पार पडल्यानंतर मंत्री संजय शिरसाट यांच्यासह सर्व नगरसेवक उपमुख्यमंत्री एकनाथ शिंदे यांची भेट घेणार आहेत. तर दुसरीकडे शिवसेना शिंदे गटाचे नेते राजेंद्र जंजाळ हे देखील उपमहापौरपदासाठी उमेदवारी अर्ज दाखल करणार आहेत. त्यामुळे १० तारखेला महापौर आणि उपमहापौर पदाच्या निवडीच्या दिवशी काय राजकीय स्थिती निर्माण होणार हे बघणं महत्वाचं असणार आहे.