महाराष्ट्र नवनिर्माण सेना प्रमुख राज ठाकरे यांनी उपमुख्यमंत्री एकनाथ शिंदे यांची भेट घेतली. महापालिकेच्या निवडणुकीत एकमेकांविरोधात टीकेची झोड उठवणारे दोन्ही नेत्यांची भेट झाल्यानं राजकीय वर्तुळात वेगवेगळ्या चर्चांनी जोर धरला होता. आता एकनाथ शिंदे आणि राज ठाकरे यांच्या भेटीत काय राजकीय चर्चा झाली याचा तपशील समोर आलाय.

महापालिकेच्या निवडणुकीत शिंदे गट आणि राज ठाकरे यांनी एकमेकांविरोधात दंड थोपटले होते. निवडणुकांच्या प्रचारादरम्यान राज ठाकरेंनी भाजपसह शिंदे गटावर हल्लाबोल चढवला होता. उद्धव ठाकरे आणि राज ठाकरे यांच्या युती झाल्याने शिंदे गट आणि मनसेमधील संबंध दुरावतील असं वाटत होतं. परंतु आज अचानक राज ठाकरे यांनी ठाण्यातील नंदनवण बंगल्यावर जाऊन एकनाथ शिंदेंची भेट घेतली. दोन्ही नेत्यामध्ये 20 ते 25 मिनिटे चर्चा झाली.

कल्याण डोंबिवली महापालिका निवडणुकीत शिंदेंच्या शिवसेनेनं सर्वाधिक जागा जिंकल्या आहेत. ठाकरेंची शिवसेना आणि मनसेला हवं तसं यश मिळालं नाही. मात्र भाजप-शिवसेनेविरुद्ध लढणाऱ्या मनसेनं महापौर निवडीवेळी शिंदेंच्या शिवसेनेसा पाठिंबा दिला. त्यांच्या या निर्णयाने सर्वांच्या भुवया उंचावल्या. शिवसेनाविरुद्ध शिवसेना असा संघर्ष असताना मनसेनं थेट शिंदेच्या शिवसेनेला पाठिंबा दिला आहे.

या भेटीत एकनाथ शिंदेंनी मनसेच्या नगरसेवकांनी शिवसेनेला दिलेल्या पाठिंब्याबद्दल मनसे अध्यक्ष राज ठाकरे यांचे आभार मानले. राज ठाकरे यांनीही उपमुख्यमंत्री एकनाथ शिंदे यांना महापालिका सभागृहातील कामकाजात मनसेचे सहकार्य राहिल, असे आश्वासन दिलं आहे, अशी माहिती सुत्रांनी दिलीय. आजच्या एकनाथ शिंदे आणि राज ठाकरेंच्या भेटीत केडीएमसी निवडणुकांसह इतरही राजकीय चर्चा झाल्याची शक्यता नाकारता येत नाही.

दरम्यान राज ठाकरे आणि एकनाथ शिंदेंच्या भेटीवर शिवसेना ठाकरे गटाच्या नेत्या सुषमा अंधारे यांनी प्रतिक्रिया दिली आहे. एकनाथ शिंदे आणि राज ठाकरे यांची एक भेट झाली. त्यावर एवढं मोठं काही राजकारण किंवा चर्चा करायची गरज नाहीये. एकनाथ शिंदे आमचे विरोधी नेते जरी असले तरी ते राज्याचे उपमुख्यमंत्री आहेत. तसेच राज ठाकरे महाराष्ट्र नवनिर्माण सेनेचे प्रमुख आहेत. त्यामुळे त्यांनी कोणाला भेटायला जावं, जाऊ नये, यावर आम्ही काही बोलू शकत नाही.