Maharashtra : स्थानिक स्वराज्य संस्थांच्या निवडणूका लवकरच होतील असे संकेत आहेत. आगामी निवडणूकांच्या पार्श्वभूमीवर मनसे पक्षाने मोर्चेबांधणी करायला सुरुवात केली आहे. लवकरच मनसे आणि शिवसेना ठाकरे गट युती करणार असल्याचे म्हटले जात आहे. निवडणुकीच्या आधी मनसेला धक्का बसल्याची माहिती समोर आली आहे.

मनसेचे नेते आणि खेडचे माजी नगराध्यक्ष वैभव खेडेकर हे महाराष्ट्र नवनिर्माण सेनेतून बाहेर पडून भाजपमध्ये जाण्याच्या चर्चा रंगल्या होत्या. या चर्चा सुरु असताना वैभव खेडेकर यांच्यासह कोकणातील काही पदाधिकाऱ्यांना तातडीने बडतर्फ करण्यात आले. खेडेकर यांना बडतर्फ केल्यानंतर महाराष्ट्र नवनिर्माण सेनेला धक्का बसला आहे.

वैभव खेडेकर यांना बडतर्फ केल्यानंतर मनसेच्या अनेक कार्यकर्त्यांनीही पक्षातून राजीनामा दिला. काहीजणांनी शिवसेनेमध्ये प्रवेश केला. या एकूण प्रकरणानंतर खेडमध्ये महाराष्ट्र नवनिर्माण सेनेच्या अनेक पदाधिकाऱ्यांनी, कार्यकर्त्यांनी शिवसेना शिंदे गटात प्रवेश केला आहे. यामुळे मनसेला कोकणात खिंडार पडल्याचे म्हटले जात आहे.

मनसे शहराध्यक्षा मीनल गांधी, मनसे शाखा अध्यक्ष सुमित सकपाळ, मनसे कुंभारवाडा विभागप्रमुख नरेश मालवणकर यांच्यासह असंख्य पदाधिकाऱ्यांनी आणि कार्यकर्त्यांनी एकनाथ शिंदे यांच्या शिंदे गटात प्रवेश केला. रामदास कदम यांच्या जामगे येथील निवासस्थानी हा पक्षप्रवेश कार्यक्रम झाला. या कार्यक्रमाला रामदास कदम यांच्यासह गृहराज्यमंत्री योगेश कदम देखील उपस्थित होते. या पक्षप्रवेशामुळे कोकणात शिवसेनेची ताकद वाढली आहे.