आगामी स्थानिक स्वराज्य संस्थांच्या निवडणुकांना अवघे काही महिने उरले असताना, सर्वच पक्षांनी मोर्चेबांधणीला सुरुवात केली आहे. कुठे अंतर्गत वाद उफाळून येत आहेत, तर कुठे नेते स्वेच्छेने पक्षाला रामराम ठोकत दुसऱ्या पक्षात प्रवेश करत आहेत. अशातच नाशिकमध्ये शिवसेना ठाकरे गटाला धक्का बसणार आहे. माजी उपनेते आणि माजी महानगर प्रमुख मशालची साथ सोडत भाजपचं कमळ हाती घेणार आहेत.

भाजपमध्ये सध्या इनकमिंग सुरूच आहे. दरम्यान, नाशिकमध्ये आज शिवसेना ठाकरे गटाचे महत्वाचे शिलेदार भाजपसोबत जाणार आहेत. माजी उपनेते सुनील बागुल आणि माजी महानगर प्रमुख मामा राजवाडे आज भाजपचं कमळ हाती घेणार आहेत. भाजपच्या वरिष्ठ नेत्यांच्या उपस्थितीत भव्य प्रवेश सोहळ्याचे आयोजन करण्यात आले आहे.

या भव्य पक्षप्रवेश सोहळ्यात विविध राजकीय पक्षांचे पदाधिकारी कार्यकर्ते भाजप पक्षात प्रवेश करणार आहेत. यावेळी शिवसेना ठाकरे गटाचे माजी उपनेते सुनील बागुल आणि माजी महानगरप्रमुख मामा राजवाडे भाजपमध्ये प्रवेश करणार आहेत. यावेळी मोठे शक्तीप्रदर्शन होणार आहे. यासह काँग्रेसचे काही माजी नगरसेवक आणि पदाधिकारी देखील भाजपसोबत जाणार असल्याची माहिती आहे.

मिळालेल्या माहितीनुसार, नाशिकच्या रावसाहेब थोरात सभागृहात हा भव्य पक्षप्रवेश सोहळा पार पडणार आहे. सुनील बागुल आणि मामा राजवाडे यांच्यासह गुलाब भोये आणि माजी नगरसेवकांसह काही पदाधिकारी भाजपचं कमळ हाती घेणार असल्याची माहिती आहे. यापक्षप्रवेशामुळे भाजप अधिक बळकट होणार असल्याचं बोललं जात आहे.