महानगरपालिका निवडणुकीच्या पार्श्वभूमीवर राज्यातील राजकारणात मोठ्या हालचाली घडत आहेत. ठाकरे बंधूंनी आपल्या पक्षांची युती जाहीर केली. तर दुसरीकडे महायुतीच्या जागावाटपाचा तिढा सुटलाय. नाशिक आणि पुण्यातील जागावाटप संदर्भात आज महायुतीमधील शिवसेना आणि भाजप नेत्यांची आज बैठक झाली. जवळपास ९ ते १० तास दोन्ही पक्षांची बैठक झाली. यात नाशिकमधील तिढा सुटला पण पुण्यातील जागावाटपावर निर्णय होऊ शकला नाही नाहीये. त्या जागांचे प्रश्न मुख्यमंत्र्यांच्या दरबारी सोडवले जाणार आहेत.

नाशिक महापालिकेमध्ये भाजप सर्वाधिक जागा लढवणार आहेत. तर शिंदेंची शिवसेना २५ ते ३० जागा लढवणार आहेत. भाजपचा हा प्रस्ताव शिवसेनेला मान्य आहे. नाशिक महापालिकेसंदर्भात जागावाटपावर चर्चा करण्यासाठी मुख्यमंत्री देवेंद्र फडणवीस, उपमुख्यमंत्री एकनाथ शिंदे, मंत्री गिरीश महाजन आणि मंत्री दादा भुसे यांच्यात बैठक पार पडली होती.

नाशिकमध्ये शिवसेनेची आधी ४५ जागांची मागणी होती. मात्र भाजपकडून त्यांना 2५ ते ३० जागा सोडण्याचा प्रस्ताव देण्यात आला असून तो शिवसेनेला मान्य असल्याची माहिती सूत्रांनी दिलीय.यामुळे नाशिकमध्ये भाजप महायुतीत मोठा भाऊ असणार आहे.

पुण्यातील जागावाटपाचा तिढा कायम

नाशिकच्या जागा वाटपाचा मार्ग मोकळा झाला मात्र पुण्याचा प्रश्न अजून अनुत्तीर्ण आहे. दरम्यान सकाळपासून पुण्यातील हॉटलमध्ये भाजपच्या कोअर कमिटीची बैठक चालू होती. मंत्री चंद्रकांत पाटील, मंत्री मुरलीधर मोहोळ, सुनील कांबळे, गणेश बिडकर, माधुरी मिसाळ, धीरज घाटे हे या बैठकीला उपस्थित होते. पुण्यात भाजप- शिवसेना युती करणार आहेत मात्र जागेबाबत अजूनही तिढा सुटला नाहीये.

ज्या जागांवर तिढा आहे त्या जागांचा निर्णय मुख्यमंत्र्यांच्या बैठकीत होणार आहे. ज्या जागांवर एकमत नाही त्या जागांबाबत मुख्यमंत्र्यांशी चर्चा केली जाणार आहे. मुख्यमंत्री फडणवीस यांच्याशी चर्चा केल्यानंतरच यादी जाहीर केली जाणार आहे. पुण्यात शिवसेनेला ३०-३५ जागा हव्या असल्याची माहिती मिळतेय.