जून महिन्यात पावसाने ओढ दिली असली तरी राज्यात राजकीय घडामोडींचा मात्र महापूर आलाय. ठाकरेसेनेच्या 6 खासदारांनी वेगळा गट स्थापन केल्यानंतर आता राज्यात ऑपरेशन तुतारी सुरू झाल्याची चर्चा आहे. शरद पवारांचे 3 खासदार NDAच्या संपर्कात असल्याची माहिती सूत्रांनी दिलीय. शरद पवारांच्या राष्ट्रवादीचे आठ खासदार आहेत.

ठाकरेंपाठोपाठ पवारांचेही खासदार फुटणार ?

सुप्रिया सुळे (बारामती)

डॉ. अमोल कोल्हे (शिरुर)

निलेश लंके (अहिल्यानगर)

धैर्यशील मोहिते-पाटील (माढा)

बजरंग सोनवणे (बीड)

अमर काळे (वर्धा)

भास्कर भगरे (दिंडोरी)

सुरेश म्हात्रे (भिवंडी)

फुटीच्या राजकारणामुळे महाविकास आघाडीत चलबिचल आहे. ऑपरेशन टायगरनंतर ऑपरेशन तुतारी राबवलं जाण्याची चर्चा आहे. याबाबत राष्ट्रवादी काँग्रेसच्या प्रदेशाध्यक्षांना विचारले असता त्यांनी याबाबतचं वृत्त फेटाळून लावलंय.

फोडाफोडीच्या राजकारणामागे एनडीए नेतृत्वाची भविष्यातील राजकीय गणित लपून राहिली नाहीत. राष्ट्रवादीच्या खासदारांच्या भूमिकेकडे आता राज्याचं लक्ष आहे.

राष्ट्रवादीत फूट पडल्यानंतर 2024 च्या लोकसभा निवडणूकीत मविआत शरद पवारांनी 10 जागा लढवून 8 जागांवर यश मिळवलं होतं. आता तुतारीवर निवडून आलेले खासदार ठाकरेसेनेप्रमाणेच फुटणार की पवारांशी निष्ठा ठेवणार याकडे सर्वांचं लक्ष लागलंय.