Maharashtra : कोल्हापूरचे दिवंगत आमदार पी. एन. पाटील यांचे सुपुत्र राहुल पाटील यांनी काँग्रेसमधून बाहेर पडण्याचा निर्णय घेतला. दोन दिवसांपूर्वी राष्ट्रवादी काँग्रेस अजित पवार गटात राहुल पाटील यांनी प्रवेश केला. राहुल पाटील यांच्यासह हातकणंगले तालुक्यातील काँग्रेस पी. एन. पाटील गटानेदेखील राष्ट्रवादी पक्षात प्रवेश केला.

राहुल पाटील आणि पाटील गटातील पदाधिकारी, कार्यकर्त्यांनी काँग्रेसची साथ सोडून राष्ट्रवादी अजित पवार गटात प्रवेश केल्याने काँग्रेस पक्षाला मोठा धक्का बसला. राहुल पाटील यांच्यानंतर आणखी एक नेता राष्ट्रवादीत प्रवेश करणार असल्याची माहिती समोर आली आहे. यामुळे काँग्रेसची कोल्हापुरात ताकद कमी झाल्याचे म्हटले जात आहे.

गोकुळचे माजी अध्यक्ष आणि संचालक असलेले अरुण डोंगळे हे लवकरच अजित पवारांच्या राष्ट्रवादी काँग्रेसमध्ये प्रवेश करणार आहेत. ५ सप्टेंबर रोजी उपमुख्यमंत्री अजित पवार यांच्या उपस्थितीमध्ये अरुण डोंगळे यांचा पक्षप्रवेश होणार असल्याची माहिती समोर आली आहे. आगामी स्थानिक स्वराज्य संस्थांच्या पार्श्वभूमीवर अजित पवार गटाची शक्ती वाढत आहे.

अरुण डोंगळे हे शिवसेना शिंदे गटामध्ये जाणार असल्याच्या चर्चा सुरु होत्या. ते एकनाथ शिंदे यांच्या सपंर्कात देखील होते. पण राहुल पाटील यांच्या पक्षप्रवेशाच्या वेळी अजित पवारांसह डोंगळे स्टेजवर दिसले. आता अरुण डोंगळे हे अजित पवार गटात जाणार असल्याचे पक्कं झाले आहे.