संजय महाजन, साम प्रतिनिधी

राज्यातील आगामी निवडणुका महायुती एकत्र लढणार की स्वतंत्रपणे लढणार प्रश्न तिन्ही पक्षातील कार्यकर्त्यांना पडलाय. कारण विविध ठिकाणी तिन्ही पक्षांकडून स्वबळाचा नारा दिलाय. तर काही ठिकाणी महायुती एकत्रच निवडणुकांना सामोरे जाणर आहे. मात्र स्वबळाच्या घोषणेवरून काही आमदारांची चिंता वाढलीय. जर युती तुटली तर कार्यकर्त्यांचे मोठे नुकसान होईल, असं शिवसेना आमदार गुलाबराव पाटील म्हणालेत. ते जळगावमध्ये पत्रकारांशी बोलत होते, त्यावेळी त्यांनी हे विधान केलंय.

दरम्यान महायुतीमधील तिन्ही पक्षांनी जेथे जमेल तेथे युती नाहीतर स्वबळाची शक्ती दाखवायची असं ठरवलंय. मुंबई, ठाणे या ठिकाणी शिंदे गट; पुणे, पिंपरी चिंचवड येथे अजित पवार गट स्वबळावर निवडणूक लढवण्याच्या तयारीत आहे. तर राज्यातील इतर महानगरपालिकेत तेथील परिस्थिती पाहून युतीबाबत निर्णय घेण्यात येणार असल्याचं तिन्ही पक्षाच्या नेत्यांकडून सांगण्यात आलंय. मात्र यामुळे काही आमदारांची आणि तेथील स्थानिक नेत्यांची चिंता वाढवलीय. जळगावमधील शिवेसना आमदार गुलाबराव पाटील यांनाही युतीबाबत चिंता लागलीय.

भाजप एकीकडे युतीबाबत बोलते, तर दुसरीकडे एकांतात स्वबळावर निवडणुका लढवण्याची भाषा करते. युती न झाल्यास कार्यकर्त्यांचे मोठे नुकसान होईल, ते "मरून जातील," असा सूचक इशाराही गुलाबराव पाटील यांनी दिला. त्यामुळे भाजपाने कार्यकर्त्यांच्या भवितव्यासाठी युती करावी. जर भाजप शंभर जागा लढेल तिथे आम्ही आमच्या ताकतीनुसार ५० जागा तर लढू पण युती तोडू नका अशी साद मंत्री गुलाबराव पाटलांनी भाजपला घातलीय.

लोकसभा विधानसभेला कार्यकर्ता काम करतो, त्यामुळे दोन-चार जागा इकडे तिकडे करा पण कार्यकर्त्याला मोठं करण्याची हीच निवडणूक असते. जिल्हा परिषद निवडणुकीच्या पार्श्वभूमीवर त्यांनी ही भूमिका मांडली. ते पुढे म्हणाले की, लोक आता हुशार झाले आहेत. पहिल्यांदा निवडून येणं सोपं असतं, पण सलग तीन-चार वेळा निवडून येणारा नेता खरा असतो. शिवसेनेचं नुकसान संजय राऊत या एकट्या माणसामुळे झालं, अशी टीकाही त्यांनी केली.