काँग्रेसचे प्रदेशाध्यक्ष नाना पटोले (Nana Patole) यांचे चिखलाना माखलेले पाय कार्यकर्त्याने धुतल्याचा व्हिडीओ सोशल मीडियावर व्हायरल होत आहे. यावरून नाना पटोले यांच्यावर सत्ताधाऱ्यांकडून जोरदार टीका होत आहे. अशामध्ये नाना पटोले यांनी याप्रकरणी पहिली प्रतिक्रिया देत संपूर्ण घटनाक्रम सांगितला. तसंच टीका करणाऱ्यांना देखील प्रत्युत्तर दिले आहे. 'कार्यकर्ता पाणी टाकत होता आणि मी पाय धूवत होतो.' असे म्हणत 'मी शेतकरी आहे चिखलात राहणारा माणूस आहे.', असे नाना पटोले यांनी सांगितले.

नाना पटोले यांनी माध्यमांशी संवाद साधताना सांगितले की, 'पाय धुण्याचा व्हिडीओ मी पाहिला. कालची घटना जी झाली आहे त्यामध्ये मी पालखीसाठी गेलो होतो. पाय चिखलाने माखले होते. कार्यकर्ता वरुन पाणी टाकत होता आणि मी पाय धुवत होतो. आता नळ नाही ना. 'हर घर मे नल हर घर मे जल' नाही ना. नाही तर मी नळाचे पाणी घेतले असते.', असे म्हणत नाना पटोले यांनी सरकारवर टीका केली.

नाना पटोले यांनी टीका करणाऱ्यांना प्रत्युत्तर देताना सांगितले की, 'सरकारमध्ये असे किती लोकं आहेत जे अंधारामध्ये ईडीचा चिखल धुतात, कसे पाय धुतात, कसे डोकं दाबतात त्यांचे काढा ना. यामुळे मी शेतकरी आहे त्यामुळे मला चिखलाची सवयी आहे. तिथे चिखल आहे म्हणून मी गजानन महाराजांच्या पालखीचे दर्शन घेणार नाही अशातला मी नाही.' तसंच, 'मी शेतकरी आहे चिखलात राहणारा माणूस आहे. त्यामुळे मला काही फरक पडत नाही. मी राजा नाही आणि मी सोन्याचा चमचा घेऊन जन्माला आलो नाही. मी शिवरायांचा मावळा आहे आणि मावळ्यासारखाच राहिल.', असे मत त्यांनी व्यक्त केले.

अकोल्यामध्ये नाना पटोले यांनी काँग्रेसच्या कार्यकर्त्याकडून चिखलाने माखलेले पाय धुवून घेतले त्यामुळे त्यांच्यावर टीकेची झोड सुरू आहे. सत्ताधाऱ्यांनी नाना पटोले यांना धारेवर धरले आहे. 'ही घटना संतापजनक आहे. नाना पटोलेंनी स्वत:ला संत समजू नये. नाना पटोले यांनी लोकशाही आणि कार्यकर्त्याचा अपमान केला.' अशी टीका राष्ट्रवादी काँग्रेस अजित पवार गटाचे आमदार अमोल मिटकरी यांनी केली. तर 'हीच खरी काँग्रेसची संस्कृती आहे.', अशी टीका भाजप आमदार अतुल भातखळकर यांनी केली. तर शिंदे गटाच्या नेत्या शीतल म्हात्रे यांनी देखील नाना पटोले यांच्यावर टीका केली. 'मनातील सरंजमशाही संतप नाही.', अशी टीका त्यांनी केली.