Laxman Hake Hunger Strike: तोडगा नाहीच! ओबीसी नेते लक्ष्मण हाकेंचा सरकारशी चर्चेस नकार; उपोषणाचा आज सहावा दिवस

अक्षय शिंदे| जालना, ता. १८ जून २०२४

ओबीसी आरक्षणाला धक्का लागू नये, या मागणीसाठी ओबीसी नेते लक्ष्मण हाके आणि त्यांचे सहकारी नवनाथ वाघमारे यांनी जालन्यातील वडुगोद्री येथे उपोषण सुरू केले आहे. काल लक्ष्मण हाके यांच्या उपोषणावर तोडगा काढण्यासाठी सरकारने त्यांना चर्चेचे निमंत्रण दिले होते. मात्र लक्ष्मण हाके यांचे शिष्टमंडळ सरकारच्या भेटीला जाणार नसल्याचे स्पष्ट झाले आहे.

ओबीसी आरक्षण धक्का लागू नये या मागणीसाठी जालन्यातील वडिगोद्री येथे लक्ष्मण हाके आणि त्यांचे सहकारी नवनाथ वाघमारे हे आमरण उपोषण करत आहेत. त्यांच्या उपोषणाचा आजचा सहावा दिवस आहे. काल मंत्री अतुल सावे, खासदार संदिपान भुमरे, भागवत कराड यांच्या शिष्टमंडळाने लक्ष्मण हाके यांची भेट घेतली होती.

या भेटीमध्ये सरकारने या उपोषणावर तोडगा काढण्यासाठी लक्ष्मण हाके यांना चर्चेचे निमंत्रण दिले होते. लक्ष्मण हाके यांनी देखील शिष्टमंडळ मुंबईला जाऊन सरकारशी चर्चा करणार असल्याचं सांगितलं होत मात्र लक्ष्मण हाके यांचे शिष्टमंडळ सरकारची चर्चा करायला जाणार नसल्याची माहिती स्वतः लक्ष्मण हाके यांनी दिली आहे.

दरम्यान, काल सरकारच्या शिष्टमंडळाने चर्चेसाठी निमंत्रण दिले होते परंतु त्यानंतर सरकारकडून कोणताही पाठपुरावा केला गेला नाही. तसेच सरकार याबाबत गंभीर दिसत नाही, अशी खंतही लक्ष्मण हाके यांनी व्यक्त केली. त्यामुळे आता या उपोषणावर काय मार्ग निघणार? हे पाहणे महत्वाचे ठरणार आहे.