Summary -

• माजी आमदार बाळा काशीवार यांनी भाजपमध्ये घरवापसी केली

• मुख्यमंत्री देवेंद्र फडणवीस आणि आमदार परिणय फुके यांच्या उपस्थितीत पक्षप्रवेश झाला

• विधानसभा निवडणुकीत बंडखोरीमुळे त्यांना सहा वर्षांसाठी निष्कासित करण्यात आलं होतं

• त्यांच्या पक्षप्रवेशामुळे भंडाऱ्यात भाजपची ताकद वाढली

शुभम देशमुख, भंडारा

आगामी स्थानिक स्वराज्य संस्थांच्या निवडणुकीपूर्वी राज्यातील राजकीय घडामोडींना वेग आला आहे. भाजपच्या आपरेशन लोटसला राज्यभर यश मिळताना दिसत आहे. इतर पक्षांच्या बड्या नेत्यांना भाजप आपल्या पक्षामध्ये आणण्याचा प्रयत्न करत आहे. भंडाऱ्यात भाजपला मोठं यश मिळाले आहे. माजी आमदार बाळा काशीवार यांनी भाजपमध्ये घरवापसी केली. मुख्यमंत्री देवेंद्र फडणवीस आणि आमदार परिणय फुकेंच्या उपस्थितीमध्ये त्यांन भाजपचे कमळ हाती घेतले. त्यांच्या पक्षप्रवेशामुळे भंडाऱ्यात भाजपची ताकद वाढली आहे. विधानसभेत बंडखोरी केल्यानं पक्षानं त्यांच्याविरोधात शिस्तभंगाची कारवाई केली होती.

मिळालेल्या माहितीनुसार, साकोलीचे भाजपचे माजी आमदार बाळा काशीवार यांची भाजपात घरवापसी झाली आहे. मुख्यमंत्री देवेंद्र फडणवीस यांच्या उपस्थितीत आमदार परिणय फुके यांच्या नेतृत्वात त्यांनी भाजपात प्रवेश केला. विधानसभा निवडणुकीत बाळा काशीवार यांनी अपक्ष उमेदवाराला पाठिंबा देत भाजपच्या उमेदवाराविरोधात प्रचार केला होता. त्यामुळे भाजपने बाळा काशीवार यांना पक्षातून ६ वर्षांसाठी निष्कासित करण्यात आलं होतं. बाळा काशीवाऱ्यांच्या घरवापसीने आगामी नगरपालिका निवडणुकीत भाजप पक्षाची ताकद वाढणार आहे.

दरम्यान, भंडाऱ्यामध्ये भाजपला मोठा धक्का बसला आहे. भाजपचे तुमसर मोहाडी विधानसभा प्रमुख, प्रदेश कार्यकारणी सदस्य, माजी नगराध्यक्ष प्रदीप पडोळे यांनी सर्व पदांचा राजीनामा दिला. स्थानिक नेत्यांनी माझा घात केला असे म्हणत भाजपच्या एका बड्या नेत्याने राजीनामा दिला. पत्रकार परिषद घेत ते रडले आणि त्यांनी राजीनामा देण्यामागचं कारण सांगितले. प्रदीप पडोळे यांच्या राजीनाम्यामुळे कार्यकर्ते नाराज झाले आहेत.