Summary -

• सोलापुरमध्ये काँग्रेस, राष्ट्रवादी आणि शिवसेनेतील दिग्गज नेत्यांचा भाजपमध्ये प्रवेश

• मुख्यमंत्री देवेंद्र फडणवीस यांच्या उपस्थितीत मुंबईत झाला पक्षप्रवेश

• पालकमंत्री जयकुमार गोरे आणि आमदारांच्या पुढाकाराने सोलापूरात मोठी राजकीय घडामोड

• आगामी निवडणुकीपूर्वी सोलापुरात भाजपची ताकद चांगलीच वाढली

आगामी स्थानिक स्वराज्य संस्थांच्या निवडणुकीपूर्वी राज्यात भाजपची ताकद चांगलीच वाढत चालली आहे. भाजपमध्ये इनकमिंग सुरूच आहे. अशातच सोलापुरमध्ये मोठी राजकीय घडामोड घडली. सोलापुरमध्ये मविआसोबत महायुतीमधील पक्षांना मोठा धक्का बसला आहे. सोलापुरातील वेगवेगळ्या पक्षातील बड्या नेत्यांनी आणि पदाधिकाऱ्यांनी भाजपमध्ये प्रवेश केला. मुंबईमध्ये मुख्यमंत्री देवेंद्र फडणवीस यांच्या उपस्थितीमध्ये या सर्वांचा पक्षप्रवेश सोहळा पार पडला.

मिळालेल्या माहितीनुसार, आगामी महानगरपालिका निवडणुकिच्या पार्श्वभूमीवर सोलापूर भाजपमध्ये जम्बो पक्षप्रवेश झाला. सोलापूरमध्ये काँग्रेस,राष्ट्रवादी आणि शिवसेनेमधून दिग्गज नेत्यांनी भाजपमध्ये प्रवेश केला. त्यामुळे सोलापुरात भाजपने सर्वच पक्षांना जोरदार धक्का दिला. मुंबईमध्ये मुख्यमंत्री देवेंद्र फडणवीस आणि प्रदेशाध्यक्ष रवींद्र चव्हाण यांच्या उपस्थितीमध्ये या सर्वांचा पक्ष प्रवेश झाला. पालकमंत्री जयकुमार गोरे, आमदार देवेंद्र कोठे आणि आमदार सचिन कल्याणशेट्टी यांच्या पुढाकाराने मुख्यमंत्री देवेंद्र फडणवीस यांच्या निवासस्थानी पक्ष प्रवेश सोहळा पार पडला.

सोलापूरमधील माजी उपमहापौर पद्माकर नाना काळे, माजी उपमहापौर दिलीप कोल्हे, माजी सभागृह नेता सुरेश पाटील, माजी नगरसेवक गुरुशांत धुत्तरगावकर, माजी नगरसेवक सुभाष डांगे, माजी नगरसेविका मंदाकिनी तोडकरी, माजी नगरसेविका कल्पना क्षीरसागर, बिज्जू प्राधाने यांच्यासह अनेकांनी भाजपचे कमळ हाती घेतले आहे. या सर्वांसमोर अनेक पदाधिकारी आणि कार्यकर्त्यांनी देखील भाजपमध्ये प्रवेश केला.

विशेष म्हणजे यावेळी काँग्रेसचे माजी आमदार दिलीप माने आणि अजित पवार मोहोळ गटाचे माजी आमदार यशवंत माने हे देखील या सोहळ्यात उपस्थित होते अशी सूत्रांची माहिती आहे. आगामी काळात आणखी दिग्गज नेते भाजपमध्ये प्रवेश करतील अशा चर्चा देखील सध्या सोलापुरात रंगताना दिसत आहेत.