Ajit Pawar on Jayant Patil Resignation: जयंत पाटील सध्या राष्ट्रवादी काँग्रेस (शरद पवार गट) पक्षाचे प्रदेशाध्यक्ष आहेत. ते पक्षाच्या प्रदेशाध्यक्ष पदाचा राजीनामा देणार असल्याच्या चर्चा रंगल्या आहेत. पाटील यांच्या जागी शशिकांत शिंदे यांची वर्णी लागणार असल्याचे म्हटले जात आहे. जयंत पाटील यांच्या राजीनाम्याची चर्चा जितेंद्र आव्हाड यांनी खोडून काढली असली, तरी शशिकांत शिंदे यांनी प्रदेशाध्यक्ष पदाच्या शर्यतीत असल्याचे म्हटले जात आहे.

जयंत पाटील यांच्या राजीनाम्याच्या चर्चा राजकीय वर्तुळात होत आहेत. याबाबत उपमुख्यमंत्री आणि पुण्याचे पालकमंत्री अजित पवार यांना काही प्रश्न विचारण्यात आले. सुरु असलेल्या चर्चांवर 'तो त्यांचा पक्ष आहे, त्यांच्या पक्षाच्या अंतर्गत त्यांनी काय करावे हा त्यांचा प्रश्न आहे', असे वक्तव्य अजित पवार यांनी केले.

जयंत पाटील तुमच्यासोबत येणार का? असा प्रश्न अजित पवार यांना विचारण्यात आला. त्यावर 'जयंत पाटील हे वरिष्ठ नेते आहेत. आम्ही एकत्र काम देखील केले आहे. आमच्या आमदारकीची आता आठवी टर्म सुरु आहे. इतकी वर्ष एकत्र काम केल्याने आमचे संबंध आहेत. पण जयंत पाटील आणि माझी राजकीय भूमिका वेगळी आहे', असे उत्तर अजित पवार यांनी दिले.

'जयंत पाटील यांनी राजीनामा कोणत्या कारणामुळे दिला किंवा ते राजीनामा देण्याच्या तयारीत का आहेत हे मला माहीत नाही. याबाबत विचारण्याचा मला अधिकारही नाही. अधिवेशनात भेटले, तर सहज त्यांना विचारेन. ते मागील ६-७ वर्षांपासून प्रदेशाध्यक्ष आहेत. अन्य पदाधिकाऱ्यांना संधी देऊन त्यांना कदाचित राष्ट्रीय पातळीवर काम करायचे असेल', असे उपमुख्यमंत्री म्हणाले.