बुलढाण्याचे आमदार संजय गायकवाड हे नेहमीच त्यांच्या बेताल वक्तव्यांमुळे चर्चेत असतात. काल महायुती सरकारमधील वादग्रस्त आणि भ्रष्ट मंत्र्यांच्या हकालपट्टीच्या मागणीसाठी उद्धव ठाकरे गटाने राज्यभर ‘जनआक्रोश आंदोलन’ केले. या आंदोलनादरम्यान मुंबईसह अनेक ठिकाणी पथनाट्य, घोषणाबाजी आणि नाट्यमय आंदोलने करण्यात आली. त्यामध्ये काही दिवसांपूर्वी गायकवाड यांनी केलेल्या कृत्याचं पथनाट्यात रूपांतर करून सादरीकरण करण्यात आलं. यावर प्रतिक्रिया देताना संजय गायकवाड यांनी ‘माझी कॉपी कोणीही करू शकत नाही. मी ओरिजनल आहे, इतकंच काय तर उबाठ्याचा बापही माझी कॉपी करू शकत नाही’ असे वादग्रस्त वक्तव्य केले होते.

हे वक्तव्य सोशल मीडियावर आणि राजकीय वर्तुळात जोरदार व्हायरल झाले. विरोधकांनी गायकवाड यांच्यावर टीकास्त्र सोडले. खासदार विनायक राऊत यांनी तर थेट टीका करत म्हटले की, "गायकवाड यांची भाषा ही महाराष्ट्राच्या राजकारणातील घाणेरडी संस्कृती दाखवते. अशा लोकांच्या वक्तव्यामुळे जनतेत राजकारणाबद्दलची घृणा वाढते. महाराष्ट्रातील जनता त्यांना त्यांचा ‘बाप’ दाखवून देईल." शिवसेना (उद्धव ठाकरे गट) नेत्या सुषमा अंधारे यांनीही प्रतिक्रिया देताना सांगितले, "त्यांची कॉपी करणं हे कोणत्याही सज्जन आणि कर्तबगार माणसाचं काम नाही. अशा शब्दांचा वापर करून लोकशाहीतील चर्चेची पातळी खालावली जाते."

वक्तव्यावरून निर्माण झालेल्या वादामुळे आणि वाढत्या दबावामुळे आज संजय गायकवाड यांनी स्पष्टीकरण देत यु-टर्न घेतला. त्यांनी सांगितले, "मी तसे बोललो नाही. तुम्ही माझ्या शब्दाचा विपर्यास केला आहे. मी उबाठा गटाच्या कार्यकर्त्यांविषयी बोललो होतो. बाळासाहेब ठाकरे हे सर्वांचे दैवत आहेत, ते सर्वांचेच बाप आहेत. माझ्या वक्तव्याचा चुकीचा अर्थ काढण्यात आला आहे."

राजकीय पातळीवर विरोधी गटाला टार्गेट करताना शब्दांचा अतिवापर आणि वैयक्तिक टीका करण्याची प्रवृत्ती महाराष्ट्रात नवी नाही. गायकवाड यांच्या या वक्तव्यामुळे शिंदे गटातील अंतर्गत प्रतिमा आणि प्रतिष्ठेवरही प्रश्नचिन्ह निर्माण झाल्याची चर्चा राजकीय वर्तुळात सुरू आहे. तसेच बुलढाण्यातील शिवसेना शिंदे गटाच्या संवाद मेळाव्यादरम्यान छापण्यात आलेल्या बॅनरवर पक्ष प्रमुख एकनाथ शिंदे यांचा फोटो आणि पक्षाचे चिन्ह नसल्याने आमदार संजय गायकवाड पक्षावर नाराज असल्याचं म्हटलं जात होतं.

कोणत्या कृतीने संजय गायकवाड चर्चेत आले ?

शिवसेना आमदार संजय गायकवाड हे काही दिवसांपूर्वी आमदार निवासात वास्तव्यास होते. यावेळेस त्यांनी आमदार निवासातील कॅन्टीन मधून जेवण मागवले होते. हे जेवण खराब निघाल्याचा आरोप करत संजय गायकवाड यांनी कॅन्टीन मधील कर्मचाऱ्याला बुक्क्यांनी मारहाण केली. या प्रकरणी आमदार संजय गायकवाड यांच्यावर कलम ३५२ अपमानित करणे, ११५(२) , मारहाण करणे , ३(५), संगनमत करून मारणे या कलमांतर्गत अदखलपात्र गुन्हा नोंदवण्यात आला. या प्रकरणानंतर संजय गायकवाड यांना विरोधकांनी चांगलेच घेरले होते. तसेच यामुळेच गायकवाड जास्त चर्चेत आले.