Maharashtra Political Crisis : निवडणुक आयोगाने शिवसेना पक्ष आणि धनुष्यबाण चिन्ह शिंदे गटाकडे देण्याचा निर्णय जाहीर केला. या निर्णयानंतर राज्याच्या राजकारणात खळबळ माजली आहे. शिवसेना पक्ष आणि चिन्ह ताब्यात घेतल्यानंतर आता सेना भवन आणि शिवसेना पक्षाची राज्यभरात असेलेली कार्यालय शिंदे गट थोड्याच दिवसात ताब्यात घेण्याची शक्यता वर्तवली जात आहे.

त्याआधी शिवसेनेचा कोट्यवधी रूपयांचा पक्षनिधी शिवसेना उद्धव बाळासाहेब ठाकरे पक्षाच्या अकाऊंटवर ट्रान्सफर झाल्याची मोठी बातमी समोर आली आहे.

याबाबत समोर आलेल्या माहितीनुसार, काल निवडणूक आयोगाने शिवसेना पक्ष (Shivsena) आणि चिन्हाबाबत मोठा निर्णय जाहीर केला. मात्र निवडणूक आयोगाचा निर्णय विरोधात जाण्याची कुणकुण ठाकरे गटाला आधीच लागली होती. त्यामुळे ठाकरे गटाकडून ही काळजी घेण्यात आली आहे.

बँकेत नविन खाते उघडून या खात्यावर पक्षनिधी ट्रान्सफर केल्याची माहिती समोर आली आहे. शिवसेना पक्ष मुख्यमंत्री एकनाथ शिंदे (Eknath Shinde) यांच्या ताब्यात गेल्यास पक्षनिधीवर ते दावा करण्याची शक्यता असल्याने अगोदरच हा पक्षनिधी वळवल्याचे समोर आले आहे.

दरम्यान, निवडणुक आयोगाच्या या निर्णयानंतर शिवसेना पक्षाच्या नावावर जे काही आहे त्याच्यावर शिंदे गट दावा सांगणार असल्याची शक्यता वर्तवली जात आहे. ज्यामध्ये शिवसेना पक्षाची राज्यभरात असेलेली कार्यालय शिंदे गट थोड्याच दिवसात ताब्यात घेणार असल्याची माहिती समोर आली आहे.