राज्य मार्ग परिवहन महामंडळातील लिपिक-टंकलेखक पदांच्या खात्यांतर्गत पदोन्नती प्रक्रियेत अनियमितता झाल्याचा आरोप महाराष्ट्र एसटी कर्मचारी काँग्रेसचे सरचिटणीस श्रीरंग बरगे यांनी केलाय. संबंधित अधिकाऱ्यांची नव्याने चौकशी करून त्यांच्यावर कठोर कारवाई करावी, अशी मागणीही त्यांनी केली.भ्रष्टाचारा साठी प्रमोशनची प्रक्रिया रखडवली असा आरोपही त्यांनी केलाय.

चालक, वाहक, शिपाई, सहायक आदी कर्मचाऱ्यांसाठी राखीव असलेल्या लिपिक-टंकलेखक पदांच्या २५ टक्के खात्यांतर्गत पदोन्नती प्रक्रियेत काही विभागांमध्ये गंभीर त्रुटी आढळून आल्या. भ्रष्टाचाराच्या उद्देशाने ही प्रक्रिया तीन ते चार वर्षे रखडवाण्यात आली. तर काही ठिकाणी ज्येष्ठता डावलून कनिष्ठ कर्मचाऱ्यांना पात्र ठरविण्यात आले. तर काही प्रकरणात नावातील बदलाचे कारण देत नियमबाह्य पद्धतीने पदोन्नती देण्यात आल्याच निदर्शनात आले.

सरळ सेवा भरतीतील रिक्त होणाऱ्या पदांपैकी २५ टक्के पदे सेवेत असलेल्या कर्मचाऱ्यांमधून दरवर्षी भरली जाणे आवश्यक असल्याच परिपत्रक आहे. पण गेली दोन ते तीन वर्षे ही प्रक्रिया रखडल्याने अनेक कर्मचारी पदोन्नतीपासून वंचित राहिले आहेत असा आरोप बरगे यांनी केला आहे. एका विभागातील खात्यांतर्गत चौकशीत समितीतील तीन अधिकाऱ्यांवर समान स्वरूपाचे आरोप केले होते. मात्र, त्यापैकी दोघांना दोषी ठरविण्यात आले, तर एका अधिकाऱ्याला निर्दोष सोडल्याचा आरोपही बरगे यांनी केला.