अकोला शहरात एका 29 वर्षीय तरुणाची हत्या. दुसरीकडे पातूर तालुक्यातील आलेगाव या ठिकाणी 17 वर्षीय मुलाची हत्या. अंकुश गोपालनंदा गवली असं अकोल्या हत्या करण्यात आलेल्या तरुणाचे नाव आहे. तर आलेगाव येथील मृत मुलाचं नाव यश गजानन गिर्है असं आहे. अंकुश याची दोन जणांनी चाकू भोकसून हत्या करण्यात आलीय.. त्यांच्या हत्येला अनैतिक संबंधाची किनार असल्याचे बोलल्या जातं.

मावळच्या देहूरोड परिसरात चोरट्यांनी एका रात्रीत तब्बल तीन दुकानांवर डल्ला मारत व्यापारी वर्गात भीतीचे वातावरण निर्माण केले आहे. या चोरीच्या घटनांमध्ये लाखो रुपयांची रोकड लंपास करण्यात आली असून दुकानांतील साहित्यही अस्ताव्यस्त करण्यात आले आहे. बाजारपेठेतील जगन्नाथ खंडेलवाल यांचे घाऊक किराणा दुकान, देहूरोड रेल्वे स्थानकाजवळील ओम मेडिकल तसेच जुना मुंबई-पुणे महामार्गावरील बालाजी ट्रेडिंग या दुकानांचे कुलूप तोडून चोरट्यांनी चोरी केली. सलग घडलेल्या या घटनांमुळे परिसरातील व्यापारी वर्गात धास्तीचे वातावरण पसरले आहे. घटनेची माहिती मिळताच देहूरोड पोलीस घटनास्थळी दाखल झाले असून दुकानातील सीसीटीव्ही फुटेजची तपासणी केली असता यात तीन चोर आढळून आले असून मोठ्या शिताफीने या चोरट्यांनी तीन ठिकाणी धाडसी चोरी केल्याचं दिसून येत आहे.

श्रीक्षेत्र भीमाशंकर येथे उद्यापासून भाविकांसाठी मंदिराचे दरवाजे खुले होणार असून त्यापूर्वी प्रशासन आणि लोकप्रतिनिधींकडून विकासकामांचा आढावा घेण्यावर भर दिला जात आहे. काल मुख्यमंत्री देवेंद्र फडणवीस यांनी मंदिर परिसरातील विविध विकासकामांची पाहणी करून संबंधित अधिकाऱ्यांना आवश्यक सूचना दिल्या.

इयत्ता अकरावीच्या ऑनलाईन प्रवेश प्रक्रियेतील दुसऱ्या नियमित फेरीची वाटप यादी माध्यमिक उच्च माध्यमिक शिक्षण विभागाने जाहीर केली आहे यात नामांकित महाविद्यालयांमधील कला आणि विज्ञान शाखेचा कटऑफ लक्षणीयरीत्या घसरला आहे त्यामुळे 90% पेक्षा कमी गुण असलेल्या विद्यार्थ्यांना दिलासा मिळाला आहे.

मराठवाडा आणि मध्य महाराष्ट्रातील काही भागांत पुढील दोन दिवसांत उष्णतेची लाट येण्याची शक्यता आहे मध्य महाराष्ट्र आणि मराठवाड्यात रविवारी तसेच विदर्भात काही ठिकाणी रविवारी आणि सोमवारी उष्णतेची लाट येण्याची शक्यता असल्याचा अंदाज भारतीय हवामानशास्त्र विभागाने वर्तवला आहे.

पुणे-कोलाड राष्ट्रीय महामार्गावरील पौड घाटात शनिवारी सकाळी एका तरुणाने विवस्त्र अवस्थेत गोंधळ घालत वाहतुकीत अडथळा निर्माण केला. धनवेवाडी वळणाजवळ रस्त्याच्या मधोमध उभा राहून तो वाहनांना अडविण्याचा प्रयत्न करत होता. पर्यटकांच्या गर्दीमुळे काही काळ वाहतूक कोंडी झाली. त्यानंतर तरुण एका चारचाकी वाहनावर चढून उड्या मारू लागला. यामुळे वाहनाचे सनरूफ फुटले तसेच वाहनाचे नुकसान झाले.