विनायक वंजारे

Adv rahul narvekar News : राज्यातील शिंदे-फडणवीस सरकार लवकरच कोसळेल, असं भाकीत राष्ट्रवादी काँग्रेसच्या दोन बड्या नेत्यांनी केलं आहे. शिंदे-फडणवीस सरकार कोसळणार हे राष्ट्रवादी काँग्रेसचे प्रदेशाध्यक्ष जयंत पाटील (Jayant Patil) यांनी भाकीत वर्तवल्यानंतर चर्चांना उधाण आलं आहे. शिंदे-फडणवीस सरकार कोसळणार का? या प्रश्नावर विधानसभा अध्यक्ष ॲड.राहुल नार्वेकर यांनी भाष्य केलं.

राहुल नार्वेकर (Rahul Narvekar) हे एक दिवसाच्या खासगी दौऱ्यासाठी सावंतवाडीत आले आहेत.यावेळी त्यांनी माध्यमांशी संवाद साधला. ॲड.राहुल नार्वेकर म्हणाले, 'आमदारांचं निलंबन करायचं की नाही हा निर्णय विधानसभा अध्यक्षांचा आहे. सुप्रीम कोर्ट त्यावर निर्णय घेण्यात सुचित करू शकत नाही. परंतु निलंबन करायचं की नाही हा निर्णय अध्यक्षांचा आहे. तर सरकार स्थापन करणं की पाडणं हे विधानसभा ठरवते. त्यामुळे सरकार पडणार असं कुणी विधानसभेच्या बाहेर बोलत असेल, चर्चा करत असेल तर त्याला मी महत्व देत नाही'.

राज्यात शिंदे सरकारला खोके सरकार अशी टीका विरोधकांकडून केली जात आहे. त्यामुळे खोक्याच्या टीकेला सत्ताधाऱ्यांकडून प्रत्युत्तर दिले जात आहे. याच खोक्याच्या आरोप-प्रत्यारोप याबाबत पत्रकारांनी त्यांना प्रश्न विचारले असता, मला फक्त आंब्याचे खोके माहीत आहेत,अशी टिपण्णी त्यांनी केली.