Summary:

• बारावीचा निकाल २ मे रोजी जाहीर होणार

• सकाळी ११ वाजता बोर्डाची पत्रकार परिषद

• दुपारी १ वाजता ऑनलाइन पाहता येणार निकाल

बारावीची परीक्षा दिलेल्या विद्यार्थ्यांसाठी अत्यंत महत्वाची बातमी आहे. निकालाची सर्व विद्यार्थी आणि पालक वाट पाहत होते. त्यांची प्रतीक्षा अखेर संपली आहे. बारावीचा निकाल शनिवारी म्हणजे येत्या २ मे रोजी जाहीर होणार आहे. दुपारी १ वाजता विद्यार्थ्यांना ऑनलाईन निकाल पाहता येणार आहे. यंदा राज्यातील सुमारे १५ लाख विद्यार्थ्यांनी बारावीची परीक्षा दिली होती.

राज्य माध्यमिक आणि उच्च माध्यमिक शिक्षण मंडळाकडून घेण्यात आलेल्या बारावी परीक्षेचा निकाल २ मे रोजी जाहीर करण्यात येणार आहे. त्या दिवशी सकाळी ११ वाजता राज्य माध्यमिक आणि उच्च माध्यमिक शिक्षण मंडळाची पत्रकार परिषद होणार आहे. या पत्रकार परिषदेत विभागनिहाय निकाल जाहीर करण्यात येणार आहे. यानंतर दुपारी १ वाजता बारावीचा निकाल विद्यार्थ्यांना ऑनलाइन पाहता येणार आहे. mahahsscboard.in या संकेतस्थळावर विद्यार्थ्यांना निकाल पाहता येईल.

यावर्षी पुणे, मुंबई, नागपूर यासह एकूण ९ विभागीय मंडळांमार्फत बारावीची परीक्षा पार पडली होती. या परीक्षेसाठी नोंदणी केलेल्या १५,३२,४८७ विद्यार्थ्यांनी परीक्षा दिली होती. यामध्ये ८,२०,२२९ मुलं आणि ७,१२,२४० मुलींचा समावेश आहे. महत्वाचे म्हणजे यावर्षी १८ तृतीयपंथी विद्यार्थ्यांनीही परीक्षा दिली होती.

दरम्यान, मागच्या वर्षी बारावीचा निकाल चांगला लागला होता. विज्ञान शाखेचा निकाल ९७.३५ टक्के तर कला आणि वाणिज्य शाखांचा निकाल ९२.६८ टक्के लागला होता. यंदाही विज्ञान, कला, वाणिज्य आणि व्यावसायिक शाखांचा निकाल एकाच वेळी जाहीर केला जाणार आहे.

निकाल पाहण्यासाठी अधिकृत संकेतस्थळे -

- https://results.digilocker.gov.in

- https://mahahsscboard.in

- https://hscresult.mkcl.org

कसा पाहाल निकाल?

- सर्वात आधी hscresult.mkcl.org, mahahsscboard.in किंवा mahresult.nic.in या अधिकृत वेबसाइटला भेट द्या.

- होम पेजवर असलेल्या ‘HSC Examination Result 2026’ यावर क्लिक करा.

- त्यानंतर तुमचा सीट नंबर आणि आईचे नाव टाका.

- ‘View Result’ बटणावर क्लिक करा. स्क्रिनवर तुमचा निकाल दिसेल.

- गुणपत्रिका डाऊनलोड करून त्याची प्रिंट आऊट काढून घ्या.