शासकीय नोकरदारांसाठी महत्त्वाची बातमी आहे. सरकारनं कर्मचाऱ्यांच्या पगारासंदर्भात मोठा निर्णय घेतलाय. कर्मचाऱ्यांना आपली सर्व माहिती ऑनलाइन भरावी लागणार आहे. अर्थ व सांख्यिकी आयुक्तालयाने 'शासकीय कर्मचाऱ्यांचा सर्वंकष माहितीकोष' अद्ययावत करण्याची प्रक्रिया सुरू केलीय. नियमित, नियमिततेतर आस्थापना, कार्यव्ययी आस्थापना, रोजंदारी, अंशकालीन आणि मानसेवी कर्मचाऱ्यांची माहिती भरावी लागणार आहे. कर्मचाऱ्यांनी ही माहिती वेळेत भरली नाही तर संबंधित कर्मचाऱ्यांचा पगारही अडकण्याची शक्यता आहे.

कोणती माहिती द्यावी लागणार?

या माहितीकोषात कर्मचाऱ्याचा सेवार्थ आयडी, नाव, जन्मदिनांक, लिंग, पदनाम, सेवेत रुजू व निवृत्तीची तारीख, भविष्य निर्वाह निधी खाते क्रमांक, पॅन, आधार, मोबाइल, ई-मेल, सामाजिक प्रवर्ग, जात, धर्म, स्वग्राम आणि दिव्यांगत्व आदी माहिती द्यावी लागेल. कर्मचाऱ्याचे सध्याचे पद, पदोन्नतीची तारीख आणि जुलै २०२६मधील संपूर्ण वेतनाची तपशीलवार माहितीही नोंदवावी लागेल. या माहितीमुळे शासकीय मनुष्यबळाची अचूक संख्या, रिक्त पदांची स्थिती व वेतनावरील खर्चाचे चित्र स्पष्ट होईल.

कधी नोंदवावी लागेल माहिती?

२ ते १५ सप्टेंबर २०२६ दरम्यान ऑनलाइन प्रणालीचा लॉग-इन आयडी व पासवर्ड मिळेल. १५ सप्टेंबर ते ३० नोव्हेंबर या कालावधीत माहिती भरून पहिले प्रमाणपत्र घ्यावे लागणार आहेत. त्रुटी दुरुस्तीसाठी १ डिसेंबर २०२६ ते २८ फेब्रुवारी २०२७ मुदत देण्यात आली आहे. त्यानंतर दुसरे प्रमाणपत्र मिळणार आहे.

प्रमाणपत्र बंधनकारक; त्याशिवाय पगार नाही

नोव्हेंबर २०२६ चे वेतन बिल सादर करताना पहिले प्रमाणपत्र जोडणे बंधनकारक आहे. फेब्रुवारी २०२७ चे वेतन बिल (मार्चमध्ये देय) सादर करतानाही दुसरे प्रमाणपत्र आवश्यक असेल. कोषागारात वेतन बिले सादर न करणाऱ्या कार्यालयांनाही कर्मचारी आणि रिक्त पदांची माहिती ऑनलाइन भरावी लागेल. १ जुलै २०२६ रोजी सेवेत असलेले आणि जुलैमध्ये स्वेच्छानिवृत्ती घेतलेले कर्मचारीही यात समाविष्ट केले जाणार आहेत.