राज्यात सलग दुसऱ्या दिवशी बदल्यांचा धडाका सुरू आहे. महाराष्ट्रात बुधवारी दोन आयएएस अधिकाऱ्यांची बदली झाली. त्यानंतर आज गुरुवारी आणखी एका बड्या IAS अधिकाऱ्यांची झाली आहे. मुख्यमंत्री देवेंद्र फडणवीस यांच्या आदेशानंतर IAS अधिकाऱ्यांची बदली झाल्याची माहिती मिळत आहे.

नागपूर महानगरपालिकेचे आयुक्त डॉ. अभिजीत चौधरी यांची बुधवारी पुणे महानगर प्रदेश विकास प्राधिकरण, महानगर आयुक्तपदी बदली झाली. त्यानंतर नागपूर महानगरपालिकेचे आयुक्तपद रिक्त झालं होतं. यामुळे नागपूर महानगर पालिकेच्या रिक्त झालेल्या मनपा आयुक्तपदी डॉ. विपीन इटनकर यांची नियुक्ती करण्यात आली आहे.

डॉ. विपीन इटनकर यांच्याकडे सध्या नागपूर जिल्हाधिकारी पदाचाही अतिरिक्त कार्यभार कायम असणार आहे. डॉ. विपीन इटनकर हे ऑगस्ट 2022 मध्ये नागपूरच्या जिल्हाधिकारीपदी रुजू झाले होते. पुढील काही दिवसांत नागपूर जिल्हाधिकारी पदावर इतर IAS अधिकाऱ्यांची नियुक्ती होणार का, हे पाहावे लागणार आहे.

दोन अधिकाऱ्यांची बुधवारी बदली

राज्यात २ बड्या आयएएस अधिकाऱ्यांची बुधवारी बदली झाली. पीएमआरडीचे योगेश म्हसे यांची मुंबईतील अल्पसंख्याक विकास विभागात बदली झाली. नागपूरचे महापालिका आयुक्त डॉ अभिजित चौधरी यांची देखील बदली झाली.

डॉ. अभिजित चौधरी पीएमआरडीएचे महानगर आयुक्तपदी नियुक्ती झाली आहे. पुरंदर विमानतळ, विमानतळासाठी शेतकऱ्यांच्या जमीन भूसंपादन, पुणे जिल्ह्यातील रिंग रोड अशा अनेक प्रकल्पांची जबाबदारी आता चौधरी यांच्यावर असणार आहे.