सूरज मसुरकर, साम टीव्ही

एसटी कर्मचाऱ्यांसाठी महत्वाची बातमी हाती आली आहे. एसटी कर्मचाऱ्यांना उर्वरित ४४ टक्के पगार मिळणार आहे. एसटी कर्मचाऱ्यांना उर्वरित ४४ टक्के पगार येत्या मंगळवारी मिळणार आहे. उर्वरित पगार मिळणार असल्याने एसटी कर्मचाऱ्यांमध्ये आनंदाचं वातावरण आहे.

महाराष्ट्र राज्य परिवहन मंडळाने कर्मचाऱ्यांना मार्च महिन्याचे वेतन देण्यासाठी अपुरा निधी मिळाल्यानं पगारात कपात करण्यात आली होती. एसटी कर्मचाऱ्यांना मासिक पगाराचा ५६ टक्के हिस्सा देण्यात आला होता. महाराष्ट्र राज्य परिवहन मंडळाच्या निर्णयाचा एसटी कर्मचाऱ्यांनी निषेध केला. अपुऱ्या पगारामुळे एसटी कामगार संघटना आंदोलनाच्या तयारीत होती.

एसटी कर्मचाऱ्यांना मार्च महिन्याचा वेतनापोटी ५६ टक्के वेतन देण्याचे आदेश सर्व विभागीय कार्यालयाला देण्यात आले होते. त्यात ७ तारखेला मिळणारे वेतन अनेक कर्मचाऱ्यांना 9 तारखेला मिळाले. त्यानंतर कपात करण्यात आल्याने कामगार संघटनांनी आंदोलनाचा पवित्रा घेतल्याचं पाहायला मिळालं. मात्र, आता एसटी महामंडळाने एसटी कर्मचाऱ्यांना उर्वरित पगार देण्याचा निर्णय घेतला आहे. त्यामुळे एसटी कर्मचाऱ्यांना उर्वरित ४४ टक्के पगार येत्या मंगळवारी मिळणार आहे.

महाराष्ट्र राज्य परिवहन मंडळात ८७ हजार कर्मचाऱ्यांच्या वेतन देयापोटी ४६० कोटीची गरज होती. मात्र फक्त २७७ कोटी रुपये मिळाले. त्यामुळे उपलब्ध निधीत ५६ टक्के वेतन देऊन ४४ टक्के वेतन कपात करण्याचा निर्णय घेण्यात आला होता. महामंडळाकडून वेतन आणि इतर खर्च भाग मिळून ९९५ कोटीची मागणी केल्यानंतर फक्त २७२ कोटी ९८ लाख रुपये देण्यात आले होते.