राज्यातल्या दुष्काळाची दाहकता वाढत चालली आहे. खरीप हंगाम वाया गेल्याने पोटा-पाण्यासाठी ग्रामस्थ गाव सोडून जातायेत. तर दुसरीकडे पशुधनाचेही हाल होतायेत. इतकंच नाहीतर आता दुष्काळासोबत चोरीचंही संकट शेतकऱ्यांवर ओढावलंय. जनावरांचा चारा चोरीला जाऊ नये म्हणून शेतकऱ्यांवर चक्क वैरणीला कुलूप लावण्याची वेळ आलीय. एकतर चारा मिळणं कठीण झालंय. त्यामुळे असलेली वैरण जपून ठेवावी लागतेय. छत्रपती संभाजीनगर जिल्ह्यातील पैठण तालुक्यातील हे भीषण वास्तव आहे. अंतरवाली खांडी गावात तर चारा-पाण्याचं संकट गंभीर बनलंय.

काही ठिकाणी तर जनावरांना केवळ एक वेळ चारा आणि एक वेळ पाणी देऊन दिवस काढले जात आहेत तर काही ठिकाणी चारा उपलब्ध नसल्याने पोटच्या लेकरासारखं वाढवलेल्या जनावरांना बाजारात विकण्याची वेळ आलीय.

सरकारनं चारा छावण्या लवकर सुरु कराव्यात, अशी मागणी विदर्भ आणि मराठवाड्यातून होतेय. एकीकडं ग्रामस्थांची पिण्याच्या पाण्यासाठी धडपड सुरू आहे. तर दुसरीकडं जनावरांना चारा आणि पाणी देऊन जगवताना बळीराजाची दमछाक होतेय