ऑगस्ट आणि सप्टेंबर महिन्यात पावसाचा मोठा खंड पडला.. यामुळे राज्यातील 20 जिल्ह्यांतील 91 तालुक्यांत तीव्र दुष्काळसदृश स्थिती निर्माण झाली असून खरिपाची पिकं पूर्णपणे करपलीयत. मराठवाड्यासह उत्तर महाराष्ट्र, विदर्भ आणि पश्चिम महाराष्ट्रातल्या काही भागात भीषण परिस्थिती निर्माण झालीय. जुलैच्या अतिवृष्टीनंतर तब्बल दीड महिन्यापासून पावसानं पाठ फिरवल्यामुळे दुष्काळ बळीराजाच्या जीवावर उठलाय....

धाराशिवमध्ये नुकसानग्रस्त शेतकरी डोळे लावून मुख्यमंत्र्यांच्या प्रतीक्षेत आहेत.. अशातच करजखेडामध्ये एक चिमुकला सायकल घेऊन मुख्यमंत्र्यांची वाट पाहत असल्याचं दिसलं... नांदेडच्या दाभड परिसरात पावसाअभावी सोयाबीनच्या पिकाचा हातातोंडाशी आलेला घास हिरावला गेल्याच्या रागातून शेतकऱ्याने स्वतःच्या करपलेल्या सोयाबीन पिकाला आग लावलीय...

दुसरीकडे बुलढाणा जिल्ह्यातील बावणबीर येथील एका तरुण शेतकऱ्याने पावसाने पाठ फिरवल्याने पीक करपून गेल्याच्या नैराश्यातून थेट मुख्यमंत्र्यांना रक्ताने पत्र लिहिलयं...

तर बुलढाण्याच्या संग्रामपूरमध्ये दुष्काळ जाहीर करण्यासह सरसकट कर्जमाफीच्या मागणीसाठी शेतकरी आक्रमक झालेत... संतप्त शेतकऱ्यांनी तहसील कार्यालयासमोर सोयाबीनच्या पिकासह बैलगाडी पेटवून सरकारचा तीव्र निषेध केलाय...

हिंगोली जिल्ह्यातील वसमत तालुक्यातील राजापूर येथे सोयाबीनचे पीक पूर्णपणे वाळून गेले आहे. डोक्यावर कर्जाचा डोंगर आणि तोंडावर आलेले सण-उत्सव यामुळे हवालदील झालेल्या शेतकऱ्यांनी आक्रोश केलाय..

मराठवाडा आणि विदर्भासह मध्य महाराष्ट्रात कोणत्या जिल्ह्यांवर दुष्काळाचं संकट आहे ते पाहूयात...

मराठवाड्यात छत्रपती संभाजीनगर, जालना, धाराशिव, बीड, लातूर, नांदेड, परभणी, हिंगोली जिल्ह्यांसह मध्य महाराष्ट्रातील अहिल्यानगर, सोलापूर, धुळे, जळगाव, नंदूरबार जिल्ह्यांत पिकांना मोठा फटका बसला आहे. तर विदर्भातील बुलढाणा, नागपूर, अमरावती, वाशिम, अकोला, यवतमाळ, वर्धा जिल्ह्यांत पावसाअभावी पिकांचं नुकसान झालं आहे.

राज्यातील शेतकरी सध्या पूर्णपणे कोलमडून गेलाय. सरकारनं त्यामुळे भरघोस आर्थिक मदत, पीक विमा भरपाई आणि जनावरांच्या चाऱ्याची सोय तातडीने करावी, अन्यथा दुष्काळानं हैराण झालेला शेतकरी पूर्णपणे उद्ध्वस्त होईल.