राहुरी विधानसभा पोटनिवडणुकीतील भाजपचे उमेदवार अक्षय कर्डिले यांना प्राजक्त तनपुरे यांनी पाठिंबा द्यावा, अशी भाजपनं विनंती केली आहे. पोटनिवडणुकीत कुणाला पाठिंबा द्यायचा? की भाजप उमेदवार अक्षय कर्डिले यांचा गेम करायचा हे तनपुरेंच्या हाती असल्याचं दिसत आहे. त्यामुळेच भाजपकडून प्राजक्त तनपुरे यांची मनधरणी केली जाते.

अक्षय कर्डिले यांच्या प्रचार सभेसाठी मुख्यमंत्री आज राहुरी येथे येणार आहेत, त्याआधी विधानपरिषदेचे सभापती राम शिंदे यांनी तनपुरे यांची भेट घेतली आहे. राम शिंदे यांनी त्यांच्यासोबत बंद दाराआड चर्चा केली. त्यानंतर चर्चांना उधाण आले आहे. पोटनिवडणुकीत तनपुरे कोणाला पाठिंबा देणार याची उत्सुकता लागली आहे. आज सकाळपासून प्राजक्त तनपुरे आपल्या कार्यालयात पक्षातील नेत्याची बैठक घेत आहेत. पाठिंबा कोणाला द्यायचा याबाबत ते विचारमंथन करत आहेत. त्याचदरम्यान विधानपरिषदेचे सभापती राम शिंदे यांनी त्यांची भेट घेऊन चर्चा केली आहे.

दुसरीकडे हाती आलेल्या माहितीनुसार तनपुरे थेट भाजपमध्ये प्रवेश न करता, कर्डिले यांना पाठिंबा जाहीर करण्याची शक्यता आहे. दोन दिवसापूर्वीच तनपुरे यांनी आपली नाराजी बोलून दाखवली होती. यामुळे प्राजक्त तनपुरे भाजपचे कमळ हातात घेतील,अशी चर्चा आहे. याबाबत शरद पवार गटाच्या खासदार सुप्रिया सुळे म्हणाल्या की, तनपुरेंच्या भाजप प्रवेशाविषयी काही माहिती नाहीये.

मी प्राजक्त तनपुरे यांच्याशी अनेकदा बोलली आहे. गेल्याच आठवड्यात आमचं बोलणं झालं होतं, तेव्हा त्यांनी सांगितलं की, ते आता निवडणूक लढू इच्छित नाहीत. त्यांची कार्यकर्त्यांशी चर्चा झाली आहे. ते आता लढणार नाहीत, असे त्यांनी सांगितले. पण पुढे आपण एकत्र काम करत राहू, असे ते म्हणालेत.

तत्त्वांशी एकनिष्ठ राहणाऱ्यांचं राजकारण संपतंय: तनपुरे

माझ्यासोबत पक्षात असणारे तिघेजण अजित पवार गटात गेले गेले, तिकडे त्यांना कॅबिनेट मंत्री पद मिळाली. मात्र दुसरीकडे आमच्यासारखे निष्ठा ठेवणाऱ्या राजकारण्यांचे राजकारण संपत चाललंय, याचे दुःख होत आहे, अशी भावना प्राजक्त तनपुरे यांनी बोलून दाखवली आहे.

2024 च्या विधानसभा निवडणुकीत घड्याळ चिन्हावर निवडणूक लढवावी, असा प्रस्ताव आला होता. पण मला निष्ठा, तत्व याच्याशी प्रामाणिक राहावं असे वाटले. पण सध्याचे राजकारण म्हणजे जो तत्वाशी जोडला राहिल त्याचे राजकारण संपतंय, याउलट जे तत्त्वांशी तडजोड करतात ते सत्तेत मोठ्या पदावरती जातात अशी स्थिती आहे, अशी खंत तनपुरे यांनी बोलून दाखवली होती.