अक्षय गवळी, साम टीव्ही प्रतिनिधी

अकोला : लातूरच्या औसा विधानसभा मतदारसंघात वंचित बहुजन आघाडीच्या उमेदवाराने माघार घेतल्यानंतर आता अकोला पश्चिम मतदारसंघातही तसाच प्रकार घडला आहे. अकोला पश्चिम मतदारसंघातील वंचितचे उमेदवार डॉ. जिशान हुसेन यांनी उमेदवारी अर्ज मागे घेतला आहे. डॉ. जिशान हुसने यांनी अचानक उमेदवारी मागे घेतल्याने राजकीय वर्तुळात चर्चांना उधाण आलं आहे.

अकोला पश्चिम मतदारसंघातील उमेदवारी अर्ज माघार घेतलेले वंचितचे उमेदवार डॉ जिशान हुसेन आणि काँग्रेसचे उमेदवार साजिद खान पठाण यांचा एक फोटो सध्या सोशल मीडियावर चांगलाच व्हायरल होत आहे. अकोला पश्चिम'मधून वंचितचे उमेदवार डॉ. जिशान हुसेन यांनी आज आपला उमेदवारी अर्ज मागे घेतलाये. त्यानंतर आता साजिद खान पठाण आणि डॉ. हुसेन यांचा सोबत असलेला फोटो व्हायरल होतोय. काल रात्रीचा हा फोटो असल्याच समजत आहे. सामाजिक कार्यकर्ते जावेद जकेरिया यांच्या मुलीच्या लग्नातील हा फोटो आहे. या फोटोमधून दोघांमध्ये मनोमिलन झाल्याचं दिसून येत आहे. त्यानंतर त्यांच्या भेटीचा फोटो सोशल मीडियावर होत आहे.

डॉ. जिशान हुसेन हे काँग्रेसचे नेते आहे. ते काँग्रेसकडून इच्छुक होते. मात्र पक्षाने त्यांचं तिकीट नाकारलं. हुसेन यांची उमेदवारी नाकारून साजिद खान पठाण यांना संधी दिली. त्यामुळे नाराज असलेल्या हुसेन यांनी बंडखोरी केली. त्यांनी वंचितकडून उमेदवारी अर्ज दाखल केला होता. अखेर आज अर्ज माघार घेण्याच्या अंतिम दिवशी डॉक्टर हुसेन यांनी आपली उमेदवारी मागे घेतली. त्यामुळे वंचितला या मतदारसंघात उमेदवार राहिला नाही. आता या मतदारसंघात वंचित बहुजन आघाडी कुणाला पाठिंबा देते हे पाहणं देखील महत्त्वाचं असणार आहे.

दरम्यान, लातूरच्या औसा विधानसभा मतदारसंघातही ठाकरे गटाच्या शिवसेनेतून बंडखोरी करूत वंचित बहुजन आघाडीकडून उमेदवारी अर्ज दाखल केलेले उमेदवार संतोष सोमवंशी यांनी आज आपला उमेदवारी अर्ज माघारी घेतला. ठाकरे गटाच्या उपनेत्या सुषमा अंधारे यांच्या मध्यस्थीने संतोष सोमवंशी यांनी उमेदवारी अर्ज माघारी घेतला आहे. तर औसा विधानसभेत ठाकरे गटाचे उमेदवार दिनकर माने यांना संतोष सोमवंशी यांनी जाहीर पाठिंबा दिला आहे.

अकोल्यातील बंडखोरी

1) अकोला पश्चिम विधानसभा

बंडखोरी कायम असलेले उमेदवार :

1) राजेश मिश्रा (अपक्ष) : ठाकरे गटाचे माजी नगरसेवक आणि शहर प्रमुख.

1) हरीश आलिमचंदाणी (अपक्ष) : माजी नगराध्यक्ष, भाजप.

2) डॉ. अशोक ओळंबे (सध्या प्रहारचे उमेदवार) : प्रदेश कार्यकारिणी सदस्य, माजी महानगराध्यक्ष भाजपचे.

माघार :

1 ) प्रकाश डवले (अपक्ष) : शिवसेना ठाकरे गट बंडखोर.

2) संजय बडोणे (अपक्ष) : महापालिकेचे माजी स्थायी समिती सभापती. भाजपचे पदाधिकारी.

3) डॉ. जिशान हूसेन (वंचितचे उमेदवार) : महापालिका माजी विरोधी पक्षनेते आणि काँग्रेस नेते.