Maharashtra Assembly Budget Session 2023: शिवसेना ठाकरे गटाचे नेते संजय राऊत यांनी विधीमंडळाचा चोरमंडळ असा उल्लेख केला होता. राऊतांंनी कोल्हापूरमध्ये केलेल्या या वक्तव्याचे मुंबईत विधीमंडळ अधिवेशनात जोरदार पडसाद उमटले. राऊत यांनी केलेल्या या वक्तव्यावरुन त्यांच्यावर हक्कभंगाची कारवाई करण्यात यावी अशी मागणी सत्ताधाऱ्यांनी लावून धरली.

या सगळ्या गोंधळानंतर भाजपा आमदार नितेश राणे यांनी संजय राऊत (Sanjay Raut) यांच्यावर जोरदार हल्लाबोल करत संजय राऊतांचं १० मिनिटं संरक्षण काढा, ते परत दिसणार नाही”, असे वक्तव्य केले.

भाजपाचे आमदार नितेश राणे (Nitesh Rane) यांनी महाराष्ट्र विधिमंडळाच्या अर्थसंकल्पीय अधिवेशनात ठाकरे गटाचे खासदार संजय राऊत यांच्यावर एकेरी भाषेत सडकून टीका केली. यावेळी बोलताना त्यांनी “आपल्याला रोज सकाळी संजय राऊतांचं ऐकावं लागतं. महाराष्ट्राला याची गरज आहे का? आपण त्यांचं काय घेऊन खाल्लं आहे. राऊतांचा आणि शिवसेनेचा काय संबंध आहे," अशा शब्दात हल्लाबोल केला.

तसेच याबद्दल पुढे बोलताना राऊतांना दिलेलं संरक्षण काढा. ते पोलिसांचे संरक्षण घेऊन फिरतात. ते सरकारने दिलेलं संरक्षण आहे, फक्त १० मिनिटे संरक्षण काढायला सांगा, ते उद्या सकाळी परत दिसणार नाही, एवढा शब्द देतो,” असे वक्तव्य नितेश राणे यांनी केले.

दरम्यान, संजय राऊत यांच्या या वक्तव्यानंतर भाजपा तसेच शिंदे गटातील नेते चांगलेच आक्रमक झाल्याचे पाहायला मिळाले. या वक्तव्यानंतर संजय राऊत यांच्यावर देवेंद्र फडणवीसांसह शिंदे गटातील आमदारांनी जोरदार हल्ला चढवला. त्यामुळेच आज दिवसभरासाठी कामकाज तहकूब करण्यात आले... (Maharashtra Politics)