कोल्हापूरकरांच्या विरोधाला डावलून गुजरातमधील वनतारात नेलेल्या महादेवीला परत आणण्याच्या हालचाली सुरू झाल्यात. त्यासाठी मठातील स्वामींसह कोल्हापुरातील नेते एकवटलेत. वनताराचे सीईओ शुक्रवारी कोल्हापुरात आले होते. जिल्हाधिकारी कार्यालयात त्यांच्यासोबत बैठक घेऊन महादेवीला परत आणण्यासाठी चर्चा झालीय. हत्तीणाला परत पाठवण्यासाठी वनताराकडून सकारात्मक संकेत देण्यात आलेत. तर जनभावना लक्षात घेऊन कोणत्याही परिस्थितीत महादेवीला परत आणण्याची ग्वाही पालकमंत्री प्रकाश आबिटकरांनी दिलीय.

वनताराचे सीईओ, नांदणी मठाचे स्वामी आणि लोकप्रतिनिधी यांच्यामध्ये दीड तास बैठक झाली. या बैठकीत नेमकी काय चर्चा झाली एक नजर टाकूया

- महादेवीला परत करण्याची मठाधिपती यांची मागणी

- महादेवीला घेऊन जाण्यामध्ये आपला संबंध नसल्याचं 'वनतारा'च्या प्रशासनाचं म्हणणं

- हत्तीणीला परत पाठवण्यासाठी 'वनतारा'च्या सीईओंकडून सकारात्मक संकेत

- हत्तीणीला परत करायचे असेल तर कायदेशीर प्रक्रिया पूर्ण करणं गरजेचं

- नांदणी परिसरामध्ये 'वनतारा'चं एक युनिट उभं करण्याची तयारी

- आजरा, चंदगड, राधानगरी तालुक्यामध्ये धुमाकूळ घालणाऱ्या हत्तींबाबत लोकप्रतिनिधींकडून 'वनतारा'ला प्रस्ताव

श्री जिनसेन भट्टारक पट्टाचार्य महास्वामी मठातील लाडक्या महादेवीला पुन्हा नांदणीत आणण्यासाठी जोरदार प्रयत्न सुरु आहेत. खासदार धनंजय महाडिकांनीही केंद्रीय वनमंत्री भूपेंद्र यादव यांची भेट घेऊन त्यांना निवेदन दिलं आहे. दरम्यान विरोधी पक्षांनी यावरुन हल्लाबोल केलाय.

सर्वोच्च न्यायालयाने मठाची याचिका फेटाळल्यानंतर महादेवीला वनतारामध्ये नेण्यात आलं. नांदणी येथील मठाला 1300 वर्षांचा वारसा आहे. भाविकांसाठी 'महादेवी' पूजनीय आहे. 33 वर्षांपासून ग्रामस्थ हत्तीणीचा सांभाळ करत असतील तर आत्ताच प्राणी हक्काचा मुद्दा का उपस्थित करण्यात आला ? वनतारा सारख्या खाजगी प्राणीसंग्रहालयात महादेवीला नेण्यामागचं कारण काय? असा सवाल उपस्थित होतोय. मात्र आजच्या बैठकीनंतर स्थानिकांच्या संघर्षाला यश येऊन महादेवी पुन्हा थाटात कोल्हापुरात कधी परतणार ? याकडे सगळ्याचं लक्ष लागलंय.