योगेश काशिद, साम टीव्ही

Beed : महादेव मुंडे हत्या प्रकरणावरून बीडचं राजकारण ढवळून निघालं आहे. या हत्या प्रकरणात नवनवीन खुलासे होत आहेत. या प्रकरणात वाल्मिक कराडवर गंभीर आरोप केले जात आहेत. आता महादेव मुंडे प्रकरणात शरद पवार गटाने उडी मारली आहे. शरद पवार गटाचे नेते शिवराज बांगर यांनी महादेव मुंडे प्रकरणात वाल्मिक कराड आणि धनंजय मुंडे यांच्यावर गंभीर आरोप केले आहेत.

बीडमध्ये राष्ट्रवादी शरद पवार गटाचे नेते शिवराज बांगर यांनी पत्रकार परिषद घेतली. धनंजय मुंडे यांनी काल वंजारी समाजाच्या अधिवेशनांमधून भाषण केल्यानंतर या भाषणातील काही मुद्द्यांना शिवराज बांगर यांनी प्रतिउत्तर दिलं. तर परळी येथील महादेव मुंडे खुण प्रकरणाहून वाल्मिक कराड आणि धनंजय मुंडेंवर गंभीर आरोप केले आहेत.

शिवराज बांगर म्हणाले, 'धनंजय मुंडे पालकमंत्री असताना वाल्मिक कराडला विचारल्याशिवाय गुन्हे दाखल होत नव्हते. माझ्यावर देखील खोटे कुणी दाखल करण्यात आले. बाळा बांगरवर देखील खोटे गुन्हे दाखल करण्यात आले'.

'आज बाळा बांगर सांगतोय की, वाल्मिक कराडनेच महादेव मुंडेंची हत्या केली. मात्र तरी देखील त्याच्यावर गुन्हा दाखल होत नाही. राजकीय वरदहस्त आहे. त्याचबरोबर धनंजय मुंडे यांचा देखील कराडवर वरदहस्त आहे, असा गंभीर आरोप शिवराज बांगर यांनी केला आहे. शिवराज बांगर यांच्या गंभीर आरोपानंतर धनंजय मुंडे काय प्रतिक्रिया देतात, हे पाहावे लागेल.