आजकाल सातत्याने अनेक आत्महत्येचे भयावह प्रकार समोर येत आहेत. निराशा, ताण यांसारख्या समस्येंमुळे आत्महत्येचे हे प्रकरण दिवसेंदिवस वाढत आहेत. या वाढत्या प्रकरणांनी मानवाचा जीव स्वस्त झाला आहे का? हा प्रश्न भेडसावतो. एकीकडे रुग्णालयात मृत्यूला झुंज देणारे, जगण्यासाठी तडफडणारे रुग्ण असतात. तर दुसरीकडे थोड्या थोडक्या कारणांवरून आयुष्याचा दोर कापणारी माणसं असतात. असाच काहीसा प्रकार नांदेडमध्ये घडला आहे. खांबावर चढून विद्युत तारेला स्पर्श करून एका मजुराने आत्महत्या केली. हा सगळा प्रकार सीसीटीव्ही कॅमेऱ्यात कैद झाला आहे.

मिळालेल्या माहितीनुसार, नांदेडच्या वसरनी भागात सदर घटना घडली आहे. खांबावर चढून विद्युत तारेला स्पर्श करून एका मजुराने आत्महत्या केली.विद्युत तारेला स्पर्श केल्याने मजूर खांबावरून खाली पडला. सदरील मजूर मध्यप्रदेश मधून कामाच्या शोधात नांदेडमध्ये आल्याची माहिती आहे.पोलीस आणि स्थानिक नागरिकांनी जखमी मजुराला रुग्णालयात दाखल केले मात्र डॉक्टरांनी त्याला मृत घोषित केले. अंगाचा थरकाप उडवणाऱ्या घटनेचा सीसीटीव्ही व्हिडिओ देखील समोर आला आहे.

सीसीटीव्ही फुटेजमध्ये चित्रित झाल्याप्रमाणे, एक व्यक्ती फुटपाथवर असलेल्या एका खांबावर चढतो. आजूबाजूने जाणारे नागरिक त्याच्याकडे पाहतात. मात्र त्याला कोणीही रोखत नाही. काही मिनिटांनंतर संबंधित व्यक्ती खांबावर पोहचली आणि सेकंदातच खाली कोसळली. या घटनेची माहिती मिळताच पोलीस घटनास्थळी दाखल झाले. त्यांनी अज्ञात व्यक्तीचा मृतदेह शवविच्छेदनासाठी रुग्णालयात पाठवला असून या व्यक्तीबाबत आणि घटनेसंदर्भात पोलीस अधिक तपास करत आहेत.