लोणावळ्यात वाढत्या चोऱ्या, सोनसाखळी हिसकावणे, खुलेआम मटका-जुगार, अवैध दारू आणि अंमली पदार्थांचा व्यापार तसेच ट्राफिक व्यवस्थेतील अकार्यक्षमता यामुळे संतप्त झालेल्या आमदार सुनील शेळके यांनी पोलिस प्रशासनावर थेट निशाणा साधला आहे. अधिवेशनात पोलिसांची प्रशंसा करणारे शेळके यांनी आता मात्र त्यांच्याच कार्यप्रणालीवर गंभीर प्रश्न उपस्थित करत, जनतेच्या असंतोषाला वाचा फोडली आहे.

“तक्रारींचा पाऊस पडतो, पण कारवाईचा मागमूसही नाही,” अशी टीका करत शेळके यांनी सांगितले की, शहरात गस्त घालणारे पोलीस आहेत की नाही, असा प्रश्न नागरिक विचारतात. गुन्हेगार सर्रास मोकाट फिरत आहेत आणि पोलिसांना कोणतीही माहिती नाही, हे अत्यंत धक्कादायक आहे, असे ते म्हणाले.

त्यांनी थेट इशारा देताना सांगितले की, “सोनसाखळी चोर कुठे आहेत, दारू कुठे विकली जाते, पावडर कुठे मिळते, मटका कुठे चालतो हे आम्हाला माहीत आहे. जर पोलिसांना हे सापडत नसेल, तर आम्ही सांगायला तयार आहोत.” शेळके यांनी जिल्ह्याचे पोलीस अधीक्षक यांचे व्यक्तिशः कौतुक केले आणि त्यांना स्ट्रेट फॉरवर्ड अधिकारी म्हणून संबोधले. मात्र, त्याचबरोबर त्यांनी स्पष्टपणे सांगितले की, “हा आदर म्हणजे दोष झाकण्याचं झाकण नव्हे. सन्मान आहे, पण भोंगळ कारभार सहन करणार नाही.”

तालुक्याची बदनामी होऊ नये हे आपले सर्वांचेच दायित्व असल्याचे सांगून शेळके यांनी प्रशासनाला शेवटचा इशारा दिला की, जर परिस्थिती सुधारली नाही, तर पुढील अधिवेशनात संपूर्ण महाराष्ट्रासमोर हा ‘तमाशा’ उघड केला जाईल. या वक्तव्यामुळे प्रशासनात खळबळ उडाली असून, आता पोलिसांची पुढील पावले काय असतील याकडे जनतेचे लक्ष लागून आहे.