नवी दिल्ली : अहमदनगरचे विजयी उमेदवार निलेश लंके यांनी लोकसभेत इंग्रजीतून खासदारकीची शपथ घेतली. निवडणुकीच्या प्रचारादरम्यान इंग्रजीवरून सुजय विखे आणि निलेश लंकेंमध्ये कलगीतुरा रंगला होता. त्यामुळेच लंकेंनी सुजय विखेंच्या नाकावर टिच्चून इंग्रजीत शपथ घेतल्याचं बोललं जात आहे. तर निलेश लकेंच्या शपथेवर शरद पवारही खूश झाले आहेत.

इंग्रजीमध्ये खासदारकीची शपथ घेत अहमदनगरचे शरद पवारांच्या राष्ट्रवादीचे नवनिर्वाचित खासदार निलेश लंकेंनी सर्वांनाच आश्चर्याचा धक्का दिला. 18 व्या लोकसभेमध्ये निवडून गेलेल्या नवनिर्वाचितांचा शपथविधी पार पडला. निलेश लंकेंनी थेट इंग्रजीतून शपथ घेत सुजय विखेंसह सर्वांनाच आश्चर्याचा धक्का दिला.

अहमदनगर मतदारसंघाच्या निवडणुकीच्या प्रचारादरम्यान, माजी खासदार सुजय विखे यांनी निलेश लंकेंवर वेगवेगळ्या मुद्द्यावरुन निशाणा साधला होता. निलेश लंकेंनी माझ्यासारखं इंग्रजी बोलून दाखवल्यास मी निवडणुकीचा उमेदवारी अर्ज भरणार नाही, असं आव्हानही सुजय विखेंनी दिलं होतं. मात्र, निलेश लंकेंनी विखे पाटलांचा 28 हजार मतांनी धुव्वा उडवला.

विजयानंतरही लंकेंनी अनेक ठिकाणी इंग्रजीमधूनच संसदेत भाषण करणार, प्रश्न विचारणार असं म्हटलं होतं. अखेर लंकेंनी विखेंच्या नाकावर टिच्चून इंग्रजीतून शपथ घेत आपल्या खासदारकीच्या कारकिर्दीची सुरुवात केली. यामुळे शरद पवारही चांगलेच खूश झाले.

नवनिर्वाचित खासदार निलेश लंकेंनी इंग्रजीतून शपथ घेत विखेंना खिजवलंय.आधी सुजय विखेंना पराभूत करत लंकेंनी नगरी दणका दिला. आता इंग्रजीत शपथ घेऊन त्यांनी विरोधक आणि टीकाकारांना चांगलाच घाम फोडला आहे. आगामी काळात नगरचे प्रश्न सोडवण्यासाठीही लंकेंकडून असाच धडाका अपेक्षित आहे.