लातूर : लोकनायक संघटनेच्या (Loknayak Sanghatana) कार्यकर्त्यांनी माहितीच्या अधिकारात (RTI) माहिती मागवून त्याआधारे खंडणी मागितली. लातूर (Latur) पोलिसांनी खंडणी घेताना संघटनेच्या कार्यकर्त्यास रंगेहात अटक केली आहे. यात चौघा विरोधात गुन्हा दाखल करण्यात आला असून एका व्यक्तीला अटक केली आहे. उर्वरित तिघे अद्यापही फरार आहेत.

हे देखील पाहा :

लातूरमध्ये एका कनिष्ठ विद्यालयाचे अनुदान मूल्यांकन झाले असून सदरील मूल्यांकनाची एक कॉपी लोकनायक संघटनेच्या कार्यकर्त्यांनी माहितीच्या अधिकारात काढून घेतली. सदरची फाईल चुकीची आहे. ती फाईल मंजूर होऊ देणार नाही, तुला ऑफिसलाही फिरू देणार नाही, तुला व तुझ्या कुटुंबियांना ठार मारू अशी धमकी देऊन लोकनायक संघटनेचे भाऊ उर्फ महादू रसाळ, किरण पाटील, सर्फराज सय्यद आणि मुक्तार शेख हे गेल्या आठ महिन्यापासून त्रास देऊन खंडणीची मागणी करत होते असा आरोप फिर्यादीने दिला आहे.

दरम्यान, आरोपींनी एक महिन्यापूर्वी फिर्यादी कडून 80 हजार रुपये खंडणी घेतली होती. आरोपी काही दिवसानंतर पुन्हा खंडणीची मागणी करू लागले. आज फिर्यादीस फोन करून सराफ लाइनच्या बाजूला असलेल्या त्यांच्या कार्यालयात संघटनेच्या कार्यकर्त्यांनी बोलावून घेतले व तेथे 2 लाख 75 हजार रुपयाची खंडणी मागितली असा तक्रारी अर्ज फिर्यादीने दिला आहे.

त्यावरून पोलीस अधीक्षक निखिल पिंगळे यांनी पोलीस ठाणे गांधी चौक येथे किरण पाटील, सर्फराज सय्यद, भाऊ उर्फ महादू रसाळ, मुक्तार शेख यांचे विरुद्ध गुन्हा दाखल केला आहे. गुन्ह्यातील आरोपीने फिर्यादीस खंडणीची मागणी करून खंडणीची रक्कम गुळमार्केट ते शाहू चौक जाणाऱ्या रोडवरील एका पान टपरीवर घेऊन येण्यास सांगितले होते.

वरिष्ठांचे मार्गदर्शन व आदेशान्वये सहाय्यक पोलीस निरीक्षक दयानंद पाटील व त्यांच्या पथकाने सदर ठिकाणी सापळा लावला. मागणीप्रमाणे खंडणी मधील रक्कम स्वीकारताना लोकनायक संघटनेचा कार्यकर्ता किरण पाटील यास पंचा समक्ष सपोनि दयानंद पाटील यांच्या पथकाने खंडणीच्या रकमेसह ताब्यात घेतले. या गुन्ह्यातील आरोपी गुन्ह्यातील इतर आरोपी फरार असून त्यांचा शोध सुरू आहे.

Edited By : Krushnarav Sathe