नगरपालिका आणि नगरपंचायत निवडणुकीच्या निकालाबाबत मोठी बातमी समोर आली आहे. नगरपालिका आणि नगर पंचायतीची मतमोजणी २१ डिसेंबरलाच होणार असल्याचा निर्णय सुप्रीम कोर्टाने दिला आहे. नागपूर खंडपीठाच्या निर्णयाला आव्हान देणारी याचिका सुप्रीम कोर्टात दाखल करण्यात आली होती. या याचिकेवर आज सुनावणी झाली यावेळी सुप्रीम कोर्टाने ही याचिका फेटाळून लावत नागपूर खंडपीठाचा निर्णय कायम ठेवला आहे.

नगरपालिका आणि नगरपंचायतीच्या निवडणुकीचे निकाल २१ डिसेंबरला जाहीर होतील असे नागपूर खंडपीठाने स्पष्ट केले होते. नागपूर खंडपीठाच्या निकालाला सुप्रीम कोर्टात आव्हान देण्यात आले होते. २ डिसेंबर रोजी झालेल्या निवडणुकीच्या मतदानाचे निकाल २० डिसेंबरच्या मतदानापूर्वी म्हणजेच २१ डिसेंबरच्या निकालाआधी जाहीर करण्यात यावे अशी मागणी याचिकाकर्त्याने केली होती. सुप्रीम कोर्टाने त्यांची याचिका फेटाळून लावली.

सुप्रीम कोर्टाने सुनावणीवेळी नगरपालिका आणि नगरपंचायतीचे निकाल पुढे-मागे होणार नाही. तर २१ डिसेंबरच्या दिवशीच मतमोजणी होऊन निकाल जाहीर होईल असे स्पष्ट केले. कोर्टाने २१ डिसेंबरपूर्वी मतमोजणी करण्यास नकार दिला. तसंच, हायकोर्टातील विविध याचिका, प्रकरणाचा आणि खंडपीठांच्या आदेशांचा परिणाम होऊन निवडणुका पुढे ढकलल्या जाणार नाहीत असे देखील सुप्रीम कोर्टाने स्पष्ट केले.

या सुनावणीदरम्यान सुप्रीम कोर्टाने राज्यातील स्थानिक स्वराज्य संस्थांच्या प्रलंबित निवडणुकांबाबत कडक भूमिका घेत या निवडणुका ३१ जानेवारी २०२६ पर्यंत पूर्ण करण्याचे आदेश दिले. कोणत्याही परिस्थितीमध्ये या निवडणुका पुढे ढकलल्या जाऊ नये असे सुप्रीम कोर्टाने यावेळी स्पष्ट सांगितले. त्यामुळे आता स्थानिक स्वराज्य संस्थांच्या निवडणुका ३१ जानेवारीच्या आतच होतील हे निश्चित झाले आहे.