भरत नागणे, साम टीव्ही

पंढरपूर: ओबीसी नेते लक्ष्मण हाके यांना महाराष्ट्र सरकारने दिलेली वाय प्लस दर्जाची सुरक्षा तात्काळ काढून घ्यावी, अशी मागणी मराठा क्रांती मोर्चाचे राज्य समन्वयक महेश डोंगरे यांनी केली आहे. 15 दिवसांच्या आत सुरक्षा न काढल्यास उच्च न्यायालयात याचिका दाखल करून राज्यभर आंदोलन छेडू असा इशारा ही डोंगरे यांनी दिला आहे. डोंगरे यांच्या मागणी नंतर पुन्हा मराठा - ओबीसी वाद उफाळून येण्याची शक्यता आहे. लक्ष्मण हाके यांना 273 मते पडली असताना, कोणते मोठे समाजकार्य किंवा योगदान नसताना वाय प्लस सुरक्षा का दिली? चार SPO, पुढे-मागे पोलीस गाड्या असं संरक्षण दिलं जात आहे.

हाके हे OBC-मराठा वाद लावून जाती-जातीत भांडण लावण्याचे आणि दंगल घडवण्याचे काम करतात असा आरोप करत त्यांनी मुख्यमंत्री देवेंद्र फडणवीस यांना विनंती केली आहे की या सुरक्षा व्यवस्थेचा फेरविचार करावा. महाराष्ट्रातील तमाम मराठा समाजातील युवकांनी आणि अठरा पगड जातीतील लोकांनी प्रत्येक पोलीस स्टेशनला, SP ऑफिसला जाऊन निवेदन द्यावे आणि पोलीस संरक्षण मागावे. सर्वात जास्त टॅक्स भरणारा मराठा समाज आहे.

जर 15 दिवसात लक्ष्मण हाके यांचे पोलीस प्रोटेक्शन काढले नाही तर आम्ही कोर्टात जाणार आहोत, मुख्यमंत्र्यांना आणि दोन्ही उपमुख्यमंत्र्यांना निवेदन देणार आहोत आणि पोलीस महासंचालक कार्यालयासमोर मोठं आंदोलन करणार आहोत. ही सुरक्षा काढली तर महाराष्ट्रात वातावरण शांत होईल, असे ही डोंगरे यांनी म्हटले आहे.