संदीप भोसले 

लातूर : यंदा दुष्काळाचे चित्र अधिक गडद होत असल्याचे पाहण्यास मिळत आहे. यात लातूर जिल्ह्यात पाण्याची समस्या अधिक बिकट होत चालली असून जिल्ह्यातील आठ मध्यम प्रकल्पांपैकी चार मध्यम प्रकल्प कोरडे पडले आहेत. यामुळे आता आगामी काळात पाण्याची समस्या अधिक तीव्र होणार आहे. नागरिकांना पाण्यासाठी भटकंती करावी लागणार आहे. 

मागील वर्षी पावसाळा कमी झाल्याने सर्वत्र पाणी टंचाईचा (Water Scarcity) सामना करावा लागत आहे. राज्यातील अनेक भागातील तलाव, धरणातील पाणी साठा आता कमी होत आहे. यामुळे पाणी टंचाई अधिक गडद झाली आहे. यात (Latur) लातूर जिल्ह्यात हे चित्र अधिक तीव्र झालेले पाहण्यास मिळत आहे. तर लातूर जिल्ह्यातून वाहणारी प्रमुख मांजरा नदीचे पात्र देखील कोरडे ठाक पडले आहे. परिणामी जनावरांसाठी पाण्याचा प्रश्न देखील निर्माण झाला आहे. 

शेती, सिंचनाचा प्रश्न 

लातूर जिल्ह्यातील चार मध्यम प्रकल्प आता कोरडे पडले असल्याने जिल्ह्यातील रेणा, व्हटी, तिरू, मसलगा या धरणांमध्ये आता ० टक्के पाणी साठा शिल्लक राहिला आहे. त्यामुळे या धरणावर अवलंबून असणाऱ्या गावांना अधिक तीव्र पाणीटंचाई जाणू लागली आहे. धरणातील पाणी कमी झाल्याने आता शेती व सिंचनाचा प्रश्न देखील निर्माण झाला आहे.