राज्यात पावसानं हाहाकार माजवला आहे. लातूर जिल्ह्यालाही पावसानं झोडपून काढलं आहे. उदगीर तालुक्यातील बोरगाव गावात रात्री पुराचे पाणी शिरल्यानं भीषण परिस्थिती निर्माण झाली आहे. संततधारेमुळे अनेक ग्रामस्थांचे संसार उद्ध्वस्त झाले असून, मोठ्या प्रमाणात जनजीवन विस्कळीत झालं आहे. पुराच्या पाण्यात ७०, शेळ्या, ७ बैल, ५ म्हशी, २ ट्रॅक्टर आणि एक पिकअप वाहन वाहून गेले आहे. हजारो एकर शेतीचं नुकसान झालं असून, पिकांचं देखील नुकसान झालं आहे. गावातील अंगणवाडी केंद्र, घरे, किराणे, दुकाने आणि गोठे पाण्याखाली गेले आहेत.

रात्रीपासून सुरू असलेल्या संततधारेमुळे लेंडी नदी ओसंडून वाहू लागली आहे. पुराचं पाणी धडकनाळ आणि बोरगाव या गावांमध्येही शिरलं आहे. पुराच्या पाण्यामुळे जनजीवन विस्कळीत झालं आहे. तसेच जनावरं देखील दगावली आहेत. सतत पडणाऱ्या पावसामुळे रस्ते जलमय झाले आहेत. उदगीर देगलूर रस्ता पूर्णपणे बंद झाला आहे. धडकनाळ येथील पूल पाण्याखाली गेल्यामुळे वाहतूक ठप्प झाली आहे.

नागरिकांचे हाल

गावातील शेकडो नागरिकांना आपली घरे सोडून मंदिरात आश्रय घ्यावा लागला. जनावरांसह शेतकऱ्यांचे ठिबक सिंचन, पाईपलाईन, गुरं - ढोरं, तसेच इतर शेतीसंबंधित साहित्य वाहून गेल्यामुळे लाखोंचं नुकसान झालंय.

माजी जिल्हा परिषद अध्यक्ष राहुल केंद्रे आणि भाजप नेते पंडित सूर्यवंशी यांनी पुरग्रस्त भागाचा आढावा घेतला. आढावा घेतल्यानंतर त्यांनी तातडने मदतकार्य सुरू करण्याची मागणी केली आहे.

वाहतुकीवर परिणाम

पावसामुळे उदगीर आणि अहमदपूर तालुक्यातील वाहतुकीवर मोठा परिणाम झाला आहे. अनेक मार्गांवरील पुल पावसामुळे पाण्याखाली गेले आहेत.

उदगीर - देगलूर मार्ग : करजखेल पूल बंद

उदगीर - हानेगाव मार्ग : हंगरगा गळसुबाई तांडा पूल बंद

उदगीर- होकर्णा/ बोंथी मार्ग : भवानी दापका पूल पाण्याखाली

माणकेश्वर - उदगीर मार्ग : इंद्रराळ पूल पाण्याखाली

अहमदपूर - अंधोरी मार्ग : मुसळधार पावसामुळे बंद.