संदीप भोसले | लातूर प्रतिनिधी | साम टीव्ही मराठी

Latur crime, Udgir murder case : लातूरच्या उदगीर शहरात एक अत्यंत धक्कादायक आणि चीड आणणारी घटना उघडकीस आली आहे. कौटुंबिक वादातून पतीने आपल्याच पत्नीच्या अंगावर पेट्रोल टाकून तिला जिवंत जाळल्याची खळबळजनक घटना घडली आहे. या भीषण घटनेत गंभीर भाजल्यामुळे तस्लिम शफी कुरेशी (वय ३६) या महिलेचा जागीच मृत्यू झाला. याप्रकरणी उदगीर ग्रामीण पोलीस ठाण्यात तिघांविरुद्ध गुन्हा दाखल करण्यात आला आहे.

नेमकी घटना काय?

मिळालेल्या माहितीनुसार, कुरेशी कुटुंबामध्ये गेल्या काही दिवसांपासून कौटुंबिक कारणावरून वाद सुरू होते. आज या वादाने उग्र रूप धारण केले. आरोपी पतीने रागाच्या भरात तस्लिम यांच्या अंगावर पेट्रोल ओतून त्यांना थेट पेटवून दिले, असा गंभीर आरोप मयत महिलेच्या नातेवाईकांनी केला आहे.

पोलिसांकडून तपास सुरू

घटनेची माहिती मिळताच उदगीर ग्रामीण पोलिसांनी तात्काळ घटनास्थळी धाव घेतली. पोलिसांनी घटनास्थळाचा पंचनामा केला असून महत्त्वाचे पुरावे संकलित केले आहेत. या प्रकरणी मयत महिलेच्या नातेवाईकांच्या तक्रारीवरून पतीसह तिघांवर गुन्हा दाखल करण्यात आला आहे. या अमानुष कृत्यामागील नेमके कारण काय होते, याचा पुढील तपास पोलीस करत आहेत.

परिसरात खळबळ आणि संताप

या धक्कादायक घटनेमुळे संपूर्ण उदगीर परिसरात मोठी खळबळ उडाली असून नागरिकांमधून तीव्र संताप व्यक्त होत आहे. एका क्षुल्लक घरगुती वादाचे पर्यवसान थेट अशा अमानुष हत्येत झाल्याने कुरेशी यांच्या कुटुंबावर दुःखाचा डोंगर कोसळला आहे. दरम्यान, फरार आरोपींना अटक करण्यासाठी पोलिसांनी चक्रा फिरवली असून, त्यांना कडक शिक्षा करण्याची मागणी मयत महिलेच्या नातेवाईकांनी केली आहे.