Latur Ausa Tuljapur Expressway BMW Car Accident 4 Killed लातूरमध्ये औसा-तुळजापूर महामार्गावर शुक्रवारी रात्री १०.१५ वाजता तीन वाहनांचा भीषण अपघात झाला. भरधाव बीएमडब्ल्यू कारने ट्रक आणि कंटेनरला जोराची धडक दिली. या कारमधील चौघांचा जागीच मृत्यू झाला, तर दोघे गंभीर जखमी आहेत. हा अपघात इतका भयानक होता की, कारचा चेंदामेंदा होऊन महामार्गावर रक्ताचा सडा पडला होता. या दुर्घटनेने परिसरात खळबळ उडाली.

अपघातग्रस्त झालेली कार सांगली येथील असून यातील तरुण काही कामानिमित्त लातूरला आले होते. काम आटोपल्यानंतर तरुणांनी शिवली येथे जेवण केले आणि त्यानंतर कारमधील एका मित्राला सोडण्यासाठी ही कार औशाकडे येत होती. दरम्यान, औशानजीक एका हॉटेल समोर पुढे चाललेल्या लाकडाने भरलेल्या ट्रकला आणि एका कंटेनरला पाठीमागून जोरदार धडक दिली.

धडक एवढी भीषण होती की, लाकडी ट्रक शंभर फूट पुढे जाऊन उलटला, तर कार पूर्णपणे चक्काचूर होऊन रस्त्यालगतच्या खड्ड्यात कोसळली. अपघातात मृत झालेल्यांची नावे धनराज काशिनाथ जाधव, आबासाहेब आप्पासाहेब साळुंके, शुभम शेषेराव पाटील, किसन रामलिंग साळुंके यांचा जागीच मृत्यू झाला.

अपघातात जयहिंद विश्वास जाधव आणि विनायक श्रीकांत हालदर हे दोघे गंभीर जखमी झाले आहेत. त्यांच्यावर सध्या रुग्णालयात उपचार सुरू आहेत. घटनेची माहिती मिळताच औशाचे पोलिस कर्मचाऱ्यांनी घटनास्थळी धाव घेतली.