रोहिदास गाडगे, शिरूर

शिरूरमध्ये गेल्या काही दिवसांपासून जमिनीच्या वादातून हाणामारी होत असलेल्या अनेक घटना समोर येत आहे. जीवे मारण्याच्या धमकीपासून ते मारहाणीचे व्हिडीओ देखील समोर आले आहेत. अशात शिरूरमध्ये जमिनीच्या वादातून आणखी एक हाणामारीची घटना घडली. जमिनीच्या वादातून महिलांमध्ये फ्री स्टाईल हाणामारी झाली. या हाणामारीचा व्हिडीओ सध्या सोशल मीडियावर व्हायरल होत आहे.

मिळालेल्या माहितीनुसार, शिरुर तालुक्यातील न्हावरे गावात जमिनीच्या वादातून महिलांमध्ये फ्री स्टाईल हाणामारी झाली. 'आमच्या बापाच्या शेतात आलात तर जिवंत ठेवणार नाही.' असं म्हणत महिलांनी महिलांना खुलेआम जीवे मारण्याची धमकी दिली. शिरूर तालुक्यातील न्हावरे गावात शेतजमिनीच्या वादातून महिलांनीच महिलांवर जिवघेणा हल्ला केला.

साधना देशमुख यांच्यासह ३ महिलांना बेदम मारहाण करण्यात आली. त्रिंबक हिंगे आणि शंकर देशमुख यांचाही मारहाण करण्यात आली. शेतातून तोडलेले कडवळ घेऊन जात असताना 7 जणांनी अडवून त्यांच्यावर जीवघेणा हल्ला केला. लोखंडी गज, लाकडी काठी, लाथा-बुक्क्यांनी या सर्वांना जबर मारहाण करण्यात आली.

शेताच्या कडेला असलेल्या शेतात आणि शेताच्या बांधावर या सर्व महिलांनी एकमेकांना बेदम मारहाण केली. या मारहाणीत महिला जखमी झाल्या आहेत. कुणाचे दात पाडले तर कुणाला अंगाला चावा घेण्यात आला. या घटनेमुळे कायदा आणि सुव्यवस्थेला प्रश्न ऐरणीवर आला आहे. महिलांनीच कायदा हातात घेतल्याचा हा व्हिडीओ समोर आला आहे.