-  मंगशे भांडेकर

Gadchiroli News : गडचिरोलीत हजारो कुणबी बांधवांनी आज (गुरुवार) जिल्हाधिकारी कार्यालयावर धडक माेर्चा काढला. या माेर्चेक-यांनी मराठ्यांना कुणबी जातीत सहभागी न करण्याची प्रमुख मागणी केली आहे. (Latest Marathi News)

मराठा समाजाला सरसकट कुणबी प्रमाणपत्र देण्याच्या शासनस्तरावर हालचाली सुरू असताना या विरोधात कुणबी समाज आक्रमक झाला आहे. गडचिरोली जिल्ह्यातील हजारो कुणबी बांधवांनी गुरुवारी जिल्हाधिकारी कार्यालयावर धडक माेर्चा काढत सरकारचा निषेध केला.

शिवाजी महाविद्यालयाच्या प्रांगणातून निघालेला हा महामोर्चा घोषणा देत जिल्हाधिकारी कार्यालयावर धडकला. बिहारच्या धर्तीवर राज्यात सर्व जातींची जातनिहाय जनगणना करावी, गडचिरोली जिल्ह्यातील ओबीसींचे वर्ग ३ व ४ च्या नोकर भरतीतील आरक्षण पूर्ववत १९ टक्के करण्यात यावे.

सरकारी नोकऱ्यांचे कंत्राटीकरण व बाह्य यंत्रणेमार्फत नोकर भरतीचा शासन निर्णय तात्काळ रद्द आदी दहा मागण्यांचे निवेदन शेषराव येलेकर (राष्ट्रीय उपाध्यक्ष ओबीसी महासंघ) यांनी जिल्हाधिकारी यांना सादर केले.

यावेळी हे निवदेन जिल्हाधिकाऱ्यांमार्फत शासनाला पाठवण्यात आल्याचे सांगण्यात आले. या मोर्चादरम्यान गडचिरोली पोलिसांनी चोख बंदोबस्त ठेवला होता.

Edited By : Siddharth Latkar