Kunal Kamra News : स्टँडअप कॉमेडियन कुणाल कामराने उपमुख्यमंत्री एकनाथ शिंदे यांच्यावर विडंबन गीत तयार केले. गाणं व्हायरल झाल्यानंतर एकनाथ शिंदे यांची शिवसेना आक्रमक झाली. ज्या स्टुडिओमध्ये कुणाल कामराचा स्टँडअपचा शो झाला होता, त्या स्टुडिओची तोडफोड करण्यात आली. त्यानंतर पर्यटनमंत्री प्रताप सरनाईक यांच्या सूचनांवरुन महापालिका अधिकारी स्टुडिओची पाहणी करण्यासाठी गेले.

महापालिका वॉर्ड ऑफिसर विसपुते आणि त्यांच्या पथकाने काल 'द हॅबिटॅट' स्टुडिओची पाहणी केली आणि स्टुडिओतील अनधिकृत भाग घोषित करत कारवाई केली. आज सलग दुसऱ्या दिवशीही पालिकेकडून स्टुडिओमधील अनधिकृत स्टुडिओवर तोडक कारवाई करण्यात आली आहे. गॅस कटरच्या सहाय्याने उर्वरित अनधिकृत भाग काढण्याचे काम सुरु आहे.

दी युनि कॉन्टिनेन्टल हॉटेलमध्ये द हॅबिटॅट स्टुडिओ आहे. कुणाल कामराने या स्टुडिओमध्ये शो केला होता. काल महापालिका अधिकाऱ्यांनी स्टुडिओची पाहणी केली. तपासातून स्टुडिओतील मोठ्या प्रमाणात अनधिकृत बांधकाम असल्याचे निष्पन्न झाले. त्यानंतर महापालिकेद्वारे तेथे तोडक कारवाई करण्यात आली आहे.

एकनाथ शिंदे यांच्यावर विडंबन गीत सादर केल्याने कुणाल कामराविरोधात राज्यभरात शिवसैनिकांनी आंदोलन केले आहे. 'मी माफी मागणार नाही', असे कुणाल कामरा म्हणाला आहे. उद्धव ठाकरे, आदित्य ठाकरे यांनी कामराच्या कृतीचे समर्थन केले आहे. शिंदेंवर टीका केल्याने कुणाल कामरा शिवसैनिकांच्या निशाण्यावर आला आहे.