कोकणातील स्वामी समर्थ भक्तांसाठी गुड न्यूज! आता कोकणातून काही तासात बसने अक्कलकोटला पोहचता येणार. महाराष्ट्र राज्य मार्ग परिवहन महामंडळाने मालवण आगारातून अक्कलकोटसाठी थेट एसटी बससेवा सुरू केली आहे. या नव्या सेवेमुळे सिंधुदुर्ग जिल्ह्यातील तसेच मार्गावरील इतर प्रवाशांना मोठा दिलासा मिळणार आहे. यापूर्वी अक्कलकोटला जाण्यासाठी प्रवाशांना बस बदलावी लागत होती. त्यामुळे वेळ आणि खर्च दोन्ही वाढत होते. मात्र, आता थेट बससेवा उपलब्ध झाल्याने प्रवास अधिक सोयीस्कर, आरामदायी आणि वेळेची बचत करणारा ठरणार आहे.

महामंडळाने दिलेल्या माहितीनुसार, सदर बस दररोज दुपारी ३.४५ वाजता मालवण आगारातून अक्कलकोटकडे रवाना होईल. तसेच परतीच्या प्रवासासाठी बस अक्कलकोट येथून सायंकाळी ७.३० वाजता मालवणकडे परत येईल. प्रवाशांच्या सोयीसाठी या बसचा मार्गही महत्त्वाच्या शहरांमधून ठेवण्यात आला आहे.

मालवण, आचरा, कणकवली, तळेरे, वैभववाडी, गगनबावडा, कोल्हापूर, सांगोला, पंढरपूर आणि सोलापूर या प्रमुख स्थानकांवरून ही बस धावणार आहे. त्यामुळे या मार्गावरील नागरिकांनाही या सेवेचा लाभ घेता येणार आहे. प्रवाशांची वाढती मागणी लक्षात घेऊन एसटी महामंडळाने या बससाठी ऑनलाइन आरक्षणाची सुविधाही उपलब्ध करून दिली आहे. त्यामुळे घरबसल्या तिकीट आरक्षित करण्याची सोय मिळाली आहे.

नागरिकांसाठी आनंदाची बाब म्हणजे महिलांना या प्रवासाच्या तिकिटात ५० टक्के सवलत मिळणार असून, ७५ वर्षांवरील ज्येष्ठ नागरिकांना १०० टक्के मोफत प्रवासाची सुविधा उपलब्ध असेल. या नव्या बससेवेमुळे सिंधुदुर्ग ते अक्कलकोट आणि सोलापूरदरम्यानचा प्रवास अधिक सुलभ होणार असून, विशेषतः स्वामी समर्थ भक्तांसाठी ही सेवा अत्यंत उपयुक्त ठरणार आहे.