कोल्हापूर जिल्ह्यातील हातकणंगले तालुक्यातील माणगाव येथे एका १५ वर्षीय अल्पवयीन मुलीची धारदार शस्त्राने वार करून हत्या करण्यात आल्याची धक्कादायक घटना समोर आली आहे. १७ ऑक्टोबर रोजी रात्री सुमारे नऊ वाजण्याच्या सुमारास सांस्कृतिक भवनासमोरील मंदिर परिसरात हा प्रकार घडला. या घटनेमुळे संपूर्ण गावात खळबळ उडाली असून, हल्ल्यानंतर पसार झालेल्या संशयिताचा शोध घेण्यासाठी पोलिसांनी तपासाची चक्रे वेगाने फिरवली आहेत.

मिळालेल्या माहितीनुसार, मृत मुलगी नववीच्या वर्गात शिक्षण घेत होती. शनिवारी रात्री ती माणगाव येथील मंदिर परिसरात असताना तिच्यावर धारदार शस्त्राने हल्ला करण्यात आला. संशयिताने मुलीच्या गळ्यावर वार केला, तर तिच्या दंडालाही गंभीर दुखापत झाली. या हल्ल्यात ती रक्ताच्या थारोळ्यात पडली. घटनेची माहिती मिळताच तिला तातडीने इचलकरंजी येथील आयजीएम रुग्णालयात उपचारासाठी नेण्यात आले. मात्र, डॉक्टरांनी तपासणी केल्यानंतर तिला मृत घोषित केले.

दरम्यान, या घटनेनंतर परिसरात भीती आणि संतापाचे वातावरण निर्माण झाले आहे. हल्ला केल्यानंतर संशयित तरुण घटनास्थळावरून पळून गेल्याची माहिती समोर आली आहे. तो पळून जात असताना सीसीटीव्ही कॅमेऱ्यात कैद झाल्याचेही सांगण्यात येत आहे. त्यामुळे पोलिसांकडून उपलब्ध सीसीटीव्ही फुटेज तपासून संशयिताची ओळख पटवण्याचे प्रयत्न सुरू आहेत.

घटनेचे गांभीर्य लक्षात घेऊन हातकणंगले पोलिसांनी तातडीने घटनास्थळी धाव घेतली. गुन्ह्याशी संबंधित पुरावे गोळा करण्यासाठी फॉरेन्सिक पथकाला पाचारण करण्यात आले, तर संशयिताचा माग काढण्यासाठी श्वान पथकाची मदत घेण्यात आली. परिसरातील परिस्थिती आणि उपलब्ध पुराव्यांच्या आधारे पोलिसांकडून तपास केला जात आहे. अल्पवयीन मुलीच्या हत्येमुळे माणगाव परिसरात हळहळ व्यक्त होत आहे. या हत्येमागील नेमके कारण अद्याप स्पष्ट झालेले नाही. संशयिताला ताब्यात घेण्यासाठी पोलिसांनी शोधमोहीम सुरू ठेवली असून, या प्रकरणातील पुढील तपासाकडे सर्वांचे लक्ष लागले आहे.